Rualbanlo voter 8,359 an awm

State Steering Committee for Accessible Election (SSCAE) chu nimin khan an chairman Madhup Vyas, chief electoral officer hoin a pisaah an ṭhukhawm a; Mizoram district 11-a khaw 26-ah rualbanlo voter 8,359 chhinchhiah a nih thu tarlan a ni.

Madhup Vyas chuan, mi tin ban phâk leh kal pawh theih inthlanna nei tura district hrang hrang thuneitute ṭhahnemngaihna chu lawmawm a tih thu a sawi a, "Polling station tina rualbanlo voter awmte chhinchhiah leh a ṭul anga ngaihven zel te, harsatna an tawh loh nana hmalak leh anmahni buaipuinaa ṭulte inzirtirna buatsaih ngaih pawimawh tur a ni," a ti.

Social Welfare, Tribal Affairs, Women & Child Development director Dr Lalhriatzuali Ralte tarlan danin, kumin September 27 aṭanga October 13 chhung khan rualbanlote pualin district 11-a khaw 26-ah Assessment & Certification Camp buatsaih a ni.

Chhinchhiah danin, electoral roll-a chuang rualbanlo, persons with disability (PwD) 2,031 an awm a, assessed PwD mi 1,129, assessed PwD Medical Board pawmpui ngai mi 564, camp aṭanga voter certify 688 leh kum 18 chung lam UDID hnuaia mi 3,947 an awm.

Ṭhutkhawmah hian, district election officer-te hmalaknaa PwD checklist bawhzui dan tur sawiho a ni a, ngenna siam ni se an ti. PwD-te tana in lama vote thlak theih dan tur te, an puala special awareness campaign buatsaih chungchang te, polling official-te training huna sign language telh chungchang te, PwD voter record kimchang siam dan turte an sawiho bawk.