KHAWTHLIR
AR-in meth man
Assam Rifles sipaite leh Zokhawthara Mizoram police-te chuan October 16, Thawhṭanni khan Zokhawtharah methamphetamine mûm 1,50,000 (kg. 17.085) leh a kawltu Laldinglian (34) s/o Vanlalhlir, Zokhawthar an man. Meth an man hi Rs 45,00,00,000 hû a ni. Assam Rifles-te hian October 13-16 chhung khan cheng vbc. 102.2 hù meth an man a ni.
Silai thehluh tur
Aizawl district magistrate Nazuk Kumar chuan inthlanna muanawm a awm theih nan Aizawl district-a silai nei zawng zawngte chu police station hnai berah a rang thei ang bera an silaite thehlut turin a hriattir. Thupek bawhchhiate chu IPC Section 188 hmanga hrem theih an ni.
Election training
Kumin MLA inthlapuia duty tur polling official-te tan nimin khan Champhai leh Kolasib district-ah training buatsaih a ni. Champhai district-a MLA bial pathuma polling station 84-ah polling official mi 452 ruat a ni a; Kolasib district-a MLA bial pathumah polling station 89-a duty tur polling official 267 ruat a ni.
SVEEP essay
Hnahthial District Election Office leh Hnahthial College-a Electoral Literacy Club-te chuan Systematic Voter’s Education & Electoral Participation (SVEEP) pual Hnahthial College zirlaite tana essay inziahsiak an buatsaih result chu nimin khan Hnahthial College auditorium-ah puan a ni. Essay thupui chu 'Democracy-a vote thlak pawimawhna' tih a ni a, third semester zirlai Lalsiammawii pakhatna niin, lawmman Rs 3,500 leh thuchei hlan a ni.
MNF puih tum
Aizawl West-II PC Party Ṭhalai hruaitute chuan nimin khan Aizawl Press Club-ah thuthar thehdarhtute an kawm a, Aizawl West-II bialah MNF candidate puih an tum thu an puang. PC Ṭhalai adviser VL Ṭhazova chuan, Mizoram Secular Alliance (MSA) chu electoral alliance a nih loh avangin kumin inthlanah PC party leh Congress party-te an thawkho dawn tihna a nih loh thu an sawi.
Cooperative training
Mizoram State Cooperative Union (MSCU) chuan nimin khan Mamit IPR conference hall-ah Mamit District Cooperative Society member-te tan training an buatsaih a, MSCU president K Lalchamreia'n a hawng. Mizoram Cooperative Apex Bank (MCAB) chairman Lalnunsanga'n MCAB mobile ATM banking, Mamit Branch a hawng bawk.