Nghenchhan tlâk leh policy ṭha nei awm chhun a ni - ZPM President

ZPM president Lalliansawta chuan ZPM chu khawpui leh thingtlanga chengte tan nghenchhan tlak leh policy ṭha nei awm chhun a nih thu leh an sorkar chuan Aizawl khawpui tâwt lutuk tihziaawm theih ngei an inbeisei thu a sawi.

Lalliansawta hian nimin khan Kawlkulh town hall-a ZPM Lengteng North & South Block Conference a hmanpuinaah thu sawiin, "ZPM hi khawpui leh thingtlanga chêngte tan party nghenchhan tlak, policy ṭha nei awm chhun kan ni a, ṭhalai, nu leh pa, tar leh upate huap zo policy ṭha duangtu leh tihlawhtlingtu turte kan ni," a ti.

Thingtlang aṭanga eibàr zawnna awlsam zawk beiseia Aizawl khawpuia lut an tam thu sawiin Lalliansawta chuan, "ZPM a sorkar chuan Aizawl khawpui tâwt lutuk hi a ziaawm ngei kan beisei. Kan kut hnathawhte'n awmzia neiin a hlâwkna kan tél ang a, khawpuia mi in hnuai luaha awm reng hi kan peih a rinawm loh," a ti a; ZPM an sorkar chuan mahni khaw chhuahna ṭheuhah kut hna thawk turin mi tam tak an lêt leh duh dawn thu a sawi.

ZPM President chuan, chief ministerial candidate ṭha tak Lalduhoma an nei tih sawiin, "IPS val, thluak ṭha, thil ṭha duh leh mi taima, ram tana rawngbawl tura mahni chawbél leihbaw ngam kan nei a, kan ram tana tih duh a neihte ti ve thei turin mipui hian hun ṭha kan pek ve tawh a ngai a ni," a ti.

Lalliansawta chuan, "ZPM a sorkar a nih chuan kawlphetha siam chhuahna kawngah nasa takin hmalak kan tum a, Pathian ráwn chungin kan theihna zawng zawng ram tan kan sáwr chhuak dawn a, kan danglam ang," a ti bawk.

Inkhawmah hian Lengteng biala ZPM candidate tur F Rodingliana leh Dampa biala candidate tur Vanlalsailova te pawhin thu an sawi a; ZPM President-in an party zawm thar mi 236 a lawm lut niin ZPM thuchhuah chuan a tarlang.