MPF leh Rahul Gandhi an inkâwm

Mizoram People Forum (MPF) General Headquarters hruaitute leh All India Congress Committee hruaitu Rahul Gandhi chu October 16, Thawhṭanni zan dar 6:30 khan Central YMA Committee Room-ah an inkâwm a, Mizoram inthlan hrang hranga MPF hmalak dan leh kalphungte an sawiho.

MPF hruaitute chuan, MPF din chhante leh Mizorama inthlanna thianghlim leh zalên a awm theihna tura hma an lak tawh dante an lo hrilh a; political party-te nena thawhhona thuthlung an siam ṭhin thu leh thuthlung chuan inthlannaah awmzia a neih ṭhin thu an sawi.

Kumina Mizoram MLA inthlanpui awm turah pawh Thawhhona Thuthlung chu political party-te'n zâwm vek thei se an duh thu MPF hruaitute chuan an sawi bawk.

Rahul Gandhi chuan, MPF leh an hnathawh dante chu a hriat tawh thu leh, MPF kalphung leh hmalaknate chu ṭha a tih thu a sawi.

Inkawmhona hi Rahul Gandhi-a'n MPF hruaitute kawm a duh anga neih a ni a; MPF aṭangin general secretary Rev. Lalramliana Pachuau leh hruaitu dang eng emaw zat an tel. Rahul Gandhi chu Mizoram Pradesh Congress Committee president Lalsawta leh Congress party hruaitu dangte'n an ṭawiawm a ni.