Meriam L Hrangchal pasal MPCC-in Mizoah an pawm

Mizoram Pradesh Congress Committee (MPCC) senior vice president Lal Thanzara chuan, Lunglei South constituency-a Indian Naional Congress (INC) candidate tur Meriam L Hrangchal pasal chu Mizoah an pawm thu a sawi.

Nimina INC candidate turte puan­naah thuthar thehdarhtute zawhna chhángin Lal Thanzara chuan, Meriami chu candidate-a dah lo turin MZP-in MPCC President hnenah an ngen thu a sawi a, "Meriami pasal hi a nu leh pa, a pi leh pu thleng pawh Mizorama awm tawh, tribal certificate pawh nei a ni. Mizo nih duha kohhran leh society-ah Mizo anga inngai (identify) an ni. Chuvang chuan, a thisenah hnam dang thisen awm pawh ni se, keini chuan Mizoah kan pawm," a ti.

MPCC Senior Vice President chuan, zirlai hruaitute'n Mizo hmeichhia, hnam dang pasal neite MLA candidate atan an duh loh thu an sawi chu lawmawm an tih thu sawiin, "Hnam humhalh an tumna a nih ka ring. Thil an hriat chian hunah chuan min beih zui loh kan beisei," a ti a; England Prime Minister leh United States Vice President pawh Indian thisen kai an nih thu a sawi a ni.