Medical college atana kan ruahmanna Congress-in an chhunzawm lo: Zorama

MNF president Zoramthanga chuan, an party-in sorkarna an chan laiin Referral Hospital, Falkawna medical college din turin ruahmanna ṭha tak an nei niin a sawi a; an hmalakna chu chhunzawm duh loah Congress sorkar a puh.

Zoramthanga hian nimin khan Mizo Hnam Rûnah thu sawiin, Congress sorkar laiin cheng vbc. 40, a hmanna tur ruahman lâwk awm lo sorkar laipuiin an pe niin a sawi a, "Ngun taka an ngaihtuah hnuin Falkawna Referral Hospital dinna atana hman turin an ti a. Congress sorkar a tla a, MPC nen sorkarna kan chan hnuah Referral Hospital hi kan chhunzawm. Keini chuan tu sorkar tih pawh ni se thil ṭha chu kan chhunzawm mai," a ti.

Cheng vbc. 40 chu ṭha taka an hman thu sawiin MNF President chuan, "Cheng vbc. 40 hian a daih theih ang angin damdawi-in leh quarters kan sa a, mahse vbc. 40 mai chuan engmah tih tham a sak theih loh avangin kan sorkar laiin sorkar laipuiah pawisa kan dil belh a ni," a ti a; cheng vbc. 40-in a tih theih chinah chuan hna an thawk ṭha niin a sawi.

Mizoram CM hlui chuan, kum 2003-08 chhunga Union Health minister Dr Ramdossa chuan sum an dil belh chungchangah, 'Sorkar laipuiah pawisa a tam a, i duh leh mamawh zat zat ka pe thei che. Mahse, damdawi-in chhawng sawm sain, hmanraw ṭha pe che mah ila, doctor i neih si loh chuan awmzia a nei lo. Aizawlah pawh doctor leh specialist hman tur i hmu thei lo a, medical college atan phei chuan i hmu hauh dawn lo' tiin a lo chhang niin a sawi.

Zoramthanga sawi danin, Union Minister thusawi hi ûmzuiin a kaihhruai sorkar chu St. John Hospital Service nen inbiain thawhhona tur an duang a; inremna ziah theih maiin engkim an peih tawh a, mahse inthlan puan a ni a, an sorkar chhunzawm tak loh avangin an chhunzawm thei lo. Chu ruahmanna chu Congress sorkarin a chhunzawm duh lo a ni.

Mizote'n referral hospital lian leh medical college din turin doctor kan la neih loh thu sawiin MNF President chuan, "Medical college din tur hian damdawi-in lian ṭhate nen thawhho a ṭul. Tuna sorkar kalpui dan hi chuan referral hospital emaw medical college emaw dinna tur khawp doctor ṭha leh thiam tawk kan hmu maiin ka ring hauh lo," a ti a; Aizawl Civil Hospital aṭanga insîksâwi leh pawhkual chuan engmah a thlen a rin loh thu a sawi.

Zoramthanga ṭawiawmtu MNF Media & Publicity i/c Lalruatkima chuan, Health Minister-in Aizawl Civil Hospital tihtêt tum a nih loh thu a sawi chu thu dik a ni lo nia sawiin, "Health & Family Welfare department chuan February 2, 2016 khan notification chhuahin, Aizawl Civil Hospital chu khum 300 awm ṭhin khum 200-a tihtêt a nih thu hi an tarlang a ni," a ti.