CM Hawla'n Naga kût a hmanpui

Manipur United Naga Council chuan, nimin khan Ukhrul, Manipur-ah Naga kût ‘Lui-Ngai-Ni’ an hmang a, sàwm a nih angin chief minister Lal Thanhawla'n a hmanpui.

CM Lal Thanhawla chuan, Manipur-a Naga hnam hrang hrang ziaráng pholanna Lui-Ngai-Ni chu Manipur sorkarin hriatpuia sorkar chawlha a puan avang leh Ministry of Tourism pawhin a hriatpui chu a lawmpui thu a sawi a, "United Naga Council hmalakna hi fakawm a, hnam hrang hrangte inkarah inunauna ṭha leh inhriatthiam tawnna thlentu pawimawh tak a ni thei," a ti.

Lal Thanhawla chuan, Kristian nihnain remna leh muanna atan kawng thui tak mawhphurhna a pek tel thu sawiin, "Hnam thilah emaw, làmah a ni emaw, kan Kristiannaah a ni emaw, intlawh tawn fo hi inpumkhatna atan a pawimawh hle a ni," a ti a; Naga kût hman chu hmasawnna duhawm tak, muanna leh hlimna thlentu a nih theihna atan duhsakna a hlan a ni.

Chanchin ṭha leh Kristiannain Naga leh Mizote a pawt khawma a hriat thu sawiin Chief Minister chuan, "Ukhrul aṭanga inṭanin Manipur hmun dangah Kristianna a darh zel a, hemi avang hian Pathianin Tangkhul hnam hi mal a sawm bik niin ka hria. Central leh state sorkarah hna sang tak tak thawk an awm a ni," a ti.

Lui-Ngai-Ni hi kum 1986 khan Manipura Naga hnam pêng Thang-khul, Kabui leh Mao-te'n buh leh thlai tuh kût (Seed Sowing Festival) tiin an hmang ṭan a; Lui-Ngai-Ni tih pawh hi heng hnam pathum
ṭawng aṭanga lak a ni.

CM Lal Thanhawla hian nimin zing khan helicopter-in Ukhrul a pan a, nimin chawhnu khan Mizoramah a rawn lêt leh a ni.