Mizoram sorkarin mimal in luah manah Thla khatah Rs. 16,98,038 a seng ṭhin

Mizoram sorkar hnuaia department hrang hrang 22 chuan pisa atan man chawiin mimal in an luah mek a, chu'ng department 22-te pisa luah man atan thla khatah sorkarin Rs. 16,98,038 a seng ṭhin.

General Administration Department (GAD) hotute aṭang thu dawn danin, Mizoram sorkarah department 45 a awm mek a, department 45 zinga 22 chuan mimal in an luah a; thla khata pisa luah man chu Rs. 16,98,038 niin, kum khatah chuan cheng nuai 203 chuang a ni.

Department 22-te hian district hrang hrangah mimal in 95 an luah hawh mek a, man chawia office luah zingah hian pisa pui ber nei tawhte pawh an awm. Mimal in luah tur hian department-te chuan GAD-ah phalna an la hmasa ṭhin.

Hetih lai hian, Mizo-ram sorkar chuan New Secretariat Complex-ah sorkar pisa hmun pek belh zelin, department ṭhenkhatin an sa mek a; tun hnaia pisa luah thar an awm nual.

Mimal in pisa atana luah zinga in luah man atana sum seng tam zual department pariat chuan district hrang hranga in luah man atan thla tin cheng nuai khat chuang an seng. A sêng tam ber Power & Electricity depatment chuan Champhai, Vairengte, Bai-rabi, Lawngtlai, Lunglei leh Aizawl hmun hrang hrangah pisa atan mimal in 19 luah mekin, thla khatah Rs. 2,38,788 an chawi ṭhin.

Sports & Youth Ser-vices departmnent chuan Aizawla hmun pathumah in luahin, thla khatah Rs. 1,72,093 an chawi ṭhin. Social Welfare department chuan hmun hrang hrang 13-ah in luah man thla khatah Rs. 1,69,843 an chawi ṭhin a; pisa an luahnate chu Aizawl bakah, Lunglei leh Tuipangte a tel.

Taxation department chuan thla khatah Rs. 1,42,493 an chawi ṭhin a, office atan in pakua an luah mek a, chungte chu Aizawl, Kolasib, Serchhip, Saiha leh Champhaiah te a ni. UD&PA department chuan Aizawla directorate bakah, hmun dang atan thla khatah Rs. 1,15,590 an sêng ṭhin a ni.

Finance department chuan hmun paruka pisa luah manah thla khat atan Rs. 1,12,473 an sêng a, pisa an luahnate chu Aizawl, Kolasib leh Saihaahte a ni. Higher & technical Education department-in hmun pathuma pisa luah man atan thla khata Rs. 1,07,866 an sêng a; chungte chu Aizawla hmun pahnihah leh Shillong-a Mizo Collegiate Boys Hostel-I atante a ni.

Pisa luah man chawite

Department Pisa zat Thla khat

Luah man

Finance 6 Rs. 1,12,473

Excise & Narcotics 1 Rs. 30,800

LEIT 2 Rs. 16,212

School Education 2 Rs. 28,911

Fisheries 2 Rs. 43,018

Minor Irrigation 4 Rs. 45,036

Rural Development 1 Rs. 12,640

Taxation 9 Rs. 1,42,493

FCSCA 5 Rs. 73,100

Planning 6 Rs. 85,412

UDPA 3 Rs. 1,15,590

Environment & Forest 1 Rs. 13,133

Sports & Youth Services 3 Rs. 1,72,093

Social Welfare 13 Rs. 1,69,843

Horticulture 1 Rs. 14,000

Corporation 1 Rs. 17,019

HTE 3 Rs. 1,07,866

Health 2 Rs. 38,200

Home 8 Rs. 92,983

Power & Electricity 19 Rs. 238,788

Information & Com. Tech. 2 Rs. 36,000

Sinlung Hills 1 Rs. 10,446