Renewable Energy Exhibition ṭan a ni

Zoram Energy Development Agency (ZEDA) chuan nimin khan Assembly Annexe building hnuaiah 1st Mizoram Renewable Energy Exhibition 2016 an buatsaih ṭan a, MJA president Vanlalrema Vantawl-in a hawng.

MJA President chuan, chakna thahrui pe chhuak thei lei hnuai aṭanga laih chhuah tuialhthei leh gas-te hi engtik niah emaw a la kang dawn a, boruak chhia a siam bawk avangin sik leh sa nasa takin a thlak danglam tih a sawi a, "Mithiamte chuan ni zung, bawlhhlawh, tui, leh a dangte aṭangin boruak tibawlhhlawh lo energy an siam nasa tawh a, Mizoram pawh hemi kawngah hian nasa zawka a tlan a pawimawh a ni," a ti.

ZEDA hi Mizoram sorkarin kum 1999-a a din niin, a hmalakna pui ber chu new & renewable energy lama Mizoram hmasawnna tur ngaihtuah a ni. Thingtlang khaw hrang hrangah ni zung chakna hmang êng, solar energy an bun tawh a, ni zung chakna hmanga power an siam chhuah tawh belhkhawm chu kilowatt 2,744 a tling.

Tun dinhmunah thli tehna khawl hmun panga - Hmuifang, Mizoram Polytechnic (Lunglei), Mamte tlang, Reiek tlang, Sakawrhmuituai tlang leh Chalfilh tlangahte an bun tawh. Lunglei Pukpuiah wind-solar hybrid system, kawlphetha kilowatt 5 siam thei pahnih an bun zo tawh a, khaw chhunga streetlight-te an châwm a ni. Tuipangah kilowatt 5 leh Cheuralah kilowatt 8 an bun mek bawk.

ZEDA hian exhibition hi Ministry of New and Renewable Energy-in sum a tumsak aṭangin an buatsaih a, February 19, 2016 thleng a awh ang. Exhibition-ah hian ZEDA-in an thil siam chhuahte an pholan bakah, electric bungraw dawr hrang hrangin an bungruate an pho chhuak a, man tláwm zawkin an hralh a ni.