KHAWTHLIR

Aizawl DC thar

Aizawl DC thar Kannan Gopinathan chuan nimin khan DC kal chhuak Dr Franklin Laltinkhuma hnen aṭangin Aizawl bawrhsap mawhphurhna a la ṭan. Kannan Gopinathan hian Hnahthial SDO aṭangin Aizawl DC hna a zawm a, Dr Franklin Laltinkhuma hian Mizoram sorkarah secretary hna a chelh zui ang.

Thisen pe

Nimin khan Lungleiah thisen pek rûnpui, Blood for Your Valentine huaihawt a ni, Lunglei
ṭhalaite'n thisen an pe. Lunglei Civil Hospital-ah chuan mipa 59 leh hmeichhia 39-te'n thisen unit 98 an pe a; Christian Hospital-ah chuan mipa pakua leh hmeichhia pakhatte'n unit 10 an pe thung.

Lok Adalat thu

February 13,khan Champhai District Court-ah Lok Adalat neih a ni a, State Bank of India leh Mizoram Rural Bank-a loan rul ṭha lote koh khawm niin, loan an rulh theihna tura remchang siamsak an ni.SBI-in cheng nuai 1.58 vel chu loan aṭangin an hmu let dawn a, MRB-in Rs. 52,800 an hmu let bawk.

Lungphùm phúm

Champhai Chhungte Primary Agricultural Credit Co-operative Society (CSPACS) ten an din Champhai Higher Secondary School building sak thar tur lungphùm chu February 13, 2016 khan Champhai DC Vanlalngaihsaka'n a phúm.

Financial literacy

MJA leh Mizoram Rural Bank, Treasury Square Branch-te chuan vawiin chhun dar 12 hian Aizawl Press Club-ah Joint Financial Literacy Campaign an buatsaih dawn a; Aizawla awm mek MJA member-te chu tel vek turin an beisei a ni.

Harsatna tâwk

Cachar Paper Mill, hun eng emaw chen hawn a nih tawh loh avangin Kolasib district-a mau hralh ṭhinte'n mau hralhna turah harsatna an tâwk a, chanchinbu neitute pawh paper lei tur avangin an buai phah. Thu dawn danin, Kolasib Forest Division pawhin tunlai hian mau permit pek an nei mumal lo a ni.