Lunglei district-ah sorkar kum kal mekah MNREGS hnuaiah ni 34 an inhlawh tawh

Lunglei District Level Vigilance & Monitoring Committee chu nimin khan Circuit House conference hall-ah an chairman, Lok Sabha MP CL Ruala leh co-chairman, Rajya Sabha MP Ronald Sapa Tlau hoin an ṭhukhawm. Meeting-ah hian MNREGS hnuaiah sorkar kum kal mekah ni 34 inhlawhna siam a nih tawh thu tarlan a ni.

CL Ruala kumtharah taimakna leh inpekna thar nen sorkar hmalakna hrang hrang kalpui turin member-te a sawm a, "Sorkar kut leh ke ber in nih avangin heng hmalaknate hlawhtlinna chu in chungah a innghat thui hle. Mizoram pumah 'Fire Prevention Week' hman mek hi uluk lehzuala kalpui a ṭul a, kumtin lo hal avanga ramngaw tihchhiat tam ta lutuk chu sorkarin a ngaimawh hle a, hemi tihtlem nan ṭanrual leh vil ngun a pawimawh takzet," a ti.

Ronald Sapa Tlau pawhin thu sawiin, "Sorkar laipuiin a scheme leh project kalpui hrang hrangte chu nasa lehzuala bawhzui a tum avangin district level-ah pawh a hma aiin taimak a ngai dawn," a ti a, sorkar hmalak-nate vilna kawngah District Level Vigilance & Monitor-ing Committee chanvo leh mawhphurhna chu a san dawn thu a sawi.

Meeting-a tarlan a nih danin, MNREGS hnuaiah cheng nuai 2748.49 hmuh a ni tawh a, job card nei mi 34141 tan ni 34 inhlawh-na siamsak an ni tawh. Kumin chhunga sum hmuh tur ang an hmuh hunah chuan ni 60 emaw a aia tam pawh inhlawhna siamsak leh hman an inbeisei a ni.

Indira Awaas Yojana (IAY) hnuaiah sorkar kum kal mekah 1st installment atan cheng nuai 54 dawn a ni tawh a, Lunglei, Hnahthial, Lungsen leh Bunghmun RD block huamchhungah in 72 sak zawh tawh a ni. IAY hnuaia in sak nan hian sorkar laipui guidelines chuan tualchhung hmanrua (materials) a tam theih ang bera hmang turin a ti a, hei hian hnathawh a ti awlsamin hmanrua tlawm zawka hmuh theih nana tih a ni.

Swacch Bharat (Gramin) hnuaiah thingtlang leh khawpui chhunga ek-in nei lo leh nei ṭha lo chhungkua chhinchhiah an ni vek tawh a, chhungkua 928 te chu latrine sakna ṭanpuina pek an ni.

Meeting-a hian Lunglei district-a MLA zingah Nihar Kanti Chakma leh Chalrosanga Ralte an tel.