Sunshine Overseas lakah YMA lawm lo

YMA sub-headquarters, Lunglei chu Serchhipa NH-54 kawngpui thawm ṭhat hna thawktu Sunshine Overseas company lakah an lungawi loh avangin nimin khan Sub-Hqrs. YMA hnuaia Kumpuan Committee hruaitute'n Ser-chhip DC Dr Lalrozama an hmu.

Serchhip aṭanga thu dawn danin, Serchhip YMA hruaitute hian NH 54, Lunglei-Aizawl kawngpui thawm ṭhat (resurfacing) hna thawktu Sunshine Overseas laka an lungawi loh thu Serchhip Bawrhsap hnenah an thlen a, a ṭul anga action la turin an ngen a ni.

Serchhip Sub-Hqrs. YMA Kumpuan Committee hruaitute sawi danin, kum 2013 chhung khan PWD (National Highway) hnuaiah Sunshine Overseas-in NH-54, Lunglei-Aizawl kawngpui thawm ṭhat hna an thawk a, Serchhip Dinthar Venga Sesah lui kam, metre 80 vela thui leh Chhiahtlang dái tuikhur bula ruam awm metre 10 vela thui chu la khawih leh tur anga sawiin an kalsan a, tun thlengin an la khawih leh lo a ni.

Serchhip YMA hruaitute chuan, Sunshine Overseas-in kawng an thawm ṭhatnaah hian a thawktute'n kum thum chhung repairing warranty a awm tih an sawi bakah, kawng viltu PWD engineer-te pawhin vawi tam tak an sawi niin an sawi a; warranty a la dam lai ngeia thawm ṭhat a nih theih nan hma laksak turin Serchhip DC an ngen a ni.