Mizoramah ICMR research project 10 chuang ti tawh

Health department leh Indian Council of Medical Research (ICMR) chuan nimin khan Aizawl Civil Hospital conference room-ah ni hnih awh tur workshop an buatsaih a; Health department leh ICMR thawhhoin research project 10 chuang Mizo-ramah an kalpui tawh a, international journal-ah article 20 chuang an chhuah tawh tih tarlan a ni.

Workshop hi Health secretary Lalrinliana Fanai-in a hawng a; Lalrinliana chuan, Mizo-ramah ICMR leh agency dang Department of Biotechnology leh World Health Organization-te bultumin research eng emaw zat tih tawh a nih thu sawiin, "Kan doctor-te'n research pawi-mawhna an hre ṭan tawh a, medical lamah kan rin dan leh ngaihdan sawi ve mai mai loin, research hmanga finfiah zel a ngai tawh a ni," a ti.

Health Secretary chuan, Mizorama medical college din turin sorkarin nasa takin ṭan a lak thu sawiin, "Aizawl Civil Hospital chu DNB (post graduate zirna) atan pawm tawh a ni a, zirlai eng emaw zat India ram hmun hrang hrang aṭangin an rawn kal tawh a, chuvangin nasa taka research lamah kan ṭhan a ngai," a ti a; Mizoram doctor-te chu nasa lehzuala research lama inhmang turin a fuih a ni.

Workshop-ah hian Health principal drirector Dr K Ropari, Hospital & Medical Education director Dr Lalbiak Kima, ACH medical superintendintent Dr Rosangluaia te pawhin thu an sawi. ICMR mithiam, Dr Chander Sekhar, Dr Reeta Rasaily, Dr AK Mukherjee, Dr PK Mohapatra, Dr Pallab Ray ten thil pawim,awhte an zirtir a ni.