MKHC inthlan thuchah: Tih theih loh tur zuara thil tiam lo turin political party leh candidate-te an ngen

Mizoram Kohhran Hruaitute Committee (MKHC) chuan November 7, 2023-a Mizoram inthlanpui neih tur pualin nimin khan thuchah an tichhuak a; hlêpna bawlhhlawh leh thamna duh lo mi, ruih theih thila fihlîm candidate atan dah tur leh, a taka tih theih loh tur zuara thil tiam lo turin political party-te leh candidate-te an ngen.

MKHC chuan, inthlan thuchah tihchhuah chungchang chu October 10, 2023-a an ṭhutkhawmah an sawiho thu an tarlang a, "Sorkar ṭha leh nghet kan neih theih nan inthlan thuchah kan siam leh a, kohhran mipui leh political party zawng zawngte'n ngai pawimawha zâwm turin kan ngen che u a ni," an ti.

MKHC-in MLA candidate atana dah tura political party an ngennate chu - Pathian ṭih mi, mi hmingṭha leh rinawm, ruih theih thila fihlim, hlêpna bawlhhlawh leh thamna duh lo, mipat hmeichhiatna kawnga hminghliauna nei lo leh, mahni awmna kohhran, sakhua leh pawla rinawmte a ni.

Mi tlemtête hamṭhatna tur bil thil intiam ang chi ṭha lo an tih thu tarlangin MKHC chuan, "Political party-te'n a taka tih theih loh tur zuara mipui bumna ang thil intiam loh ni se," an ti a; vote lei tum lo tura party leh candidate-te an ngen rualin, sum leh therhlo hmanga lei tumtute lakah an vote hralh lo tur leh chutianga tite chu hnâwl turin mipui an ngen bawk.

MKHC INTHLAN THUCHAH

1. Inthlanna thianghlim leh zalen taka mi tinin mahni duh zawng thlan a nih theih nan political party zawng zawngte'n hel pawl rawih emaw, invau leh ralthuam lam chi emaw hman loh ni se.

2. Candidate-te'n inthlan dawna vote leina anga ngaih theih sum leh thil dang sem emaw, pek emaw tih loh ni se.

3. Kohhran leh khawtlang inpumkhatna leh inunauna tichhe thei - hnam bil emaw, pawl emaw tan political party leh candidate-te'n hma lak loh ni se.

4. Political party tin leh candidate tinte'n tharum thawhna chawk tho thei zawnga ṭawngkam uchuak tak leh inelsên zawnga mi dang sawichhiat loh ni se, chutiang lam hawi reng reng chu social media-ah vawrh darh loh ni se.

5. Political party-te'n a taka tih theih loh tur zuara mipui bumna ang thil intiam loh ni se.

6. Candidate-te hmalakna tura pawl bik emaw, hnam bik emaw, mi tlemtête hamṭhatna tur emawa intiamtir loh ni se.

7. Mi tu mahin sum leh therhlo hmanga min lei tumtute lakah kan vote (zalenna) hralh loh ni se. Hetianga tih tumtute hnâwl ngam tura ṭan lak ni se.

8. Political party leh candidate-te'n intihphurna atana ruai ṭheh leh sum séng hnem zawnga hmalak loh ni se.

9. Kristian ram kan nih angin mipuite'n zawlnei der leh zàwlthupuan hnâwl nachang hre tur leh political party-te'n hetiang thupuan ang chi reng reng hmanrua atan hman loh ni se.

10. Vote nei zawng zawngte'n kan mawhphurhna a nih ang taka vote thlak vek ni se.

11. Sorkarna siamtu apiang chu kan ram tana Pathian ruat an ni tih mipuite'n kan hriat a, sawiselna tur ringawt ngaihtuah lo a, ram leh hnam tan dik taka hna an thawh theih nana ṭawiawm hi kan bat a ni tih i hre reng ang u.

12. Kan ram hruaitu tur mi ṭha kan thlan chhuah theih nan leh muanawm taka inthlan a nih theih nan Pathian hnenah ṭawngṭaiin ṭan i la zel ang u.