BJP-in an candidate tur an puang; Assembly bial 23 an chuh dawn

Bharatiya Janata Party (BJP) national general secretary Arun Singh chuan November 7, 2023-a Mizoram Assembly inthlanpuia an candidate turte nimin khan an puang a, constituency 23 an chuh dawn.

BJP candidate tur zingah hian kum 2018 inthlanpuia MLA atana thlan tlin pahnih - Lalrinliana Sailo leh Dr K Beichhua te an tel a; anni pahnih hi inthlan hmasaah khan MNF ticket-a thlan tlin ve ve niin, Lalrinliana Sailo chu Chalfilh bialah leh K Beichhua chu Saiha bialah thlan tlin an ni.

BJP hian Mamit district-a bial pathum, Kolasib district-a bial pathum leh Saiha district-a bial pahnih an chuh kim a, Hnahthial district-ahte candidate an nei lo thung. An candidate tur zingah hmeichhia pali an tel.

BJP, Mizoram Pradesh president Vanlalhmuaka chu Dampa bialah a ding dawn a; tun hnaia BJP zawmtu Lalrinliana Sailo, Assembly speaker leh MLA aṭanga báng ta chu Mamit bialah a ding dawn a ni.

Nimina candidate puanna inkhawmah BJP, Mizoram president Vanlalhmuaka chuan, kumin inthlanpuiah BJP-in an party malin sorkar an siam lo a nih pawhin, BJP tel loin sorkar a piang dawn lo niin a sawi a, "Sorkarna siam turin kan inbuatsaih a, kan sorkar dawn a ni tih sawi thei awm chhun party chu BJP chiah kan ni a, party dang chuan an la sawi thei ve rih lo. A mala sorkarna kan siam thei lo a nih chuan BJP chuan Congress party tih loh chu kan thawhpui thei vek a ni," a ti.