MLA pahnih an ding tawh dawn lo; MLA pathumin dinna bial an sawn

MLA term kal mek, State Legislative Assembly pariatnaa MLA atana thlan tlin zinga pahnih chu November 7, 2023-a MLA inthlanpui awm turah an ding tawh dawn lo a; MLA ni mek zinga pathum chuan kum 2018-a an dinna bial kalsanin, bial dangah an ding dawn.

MLA ni lai ding tawh lo turte Hrangturzo biala MNF ticket-a thlan tlin Lalchamliana, Home minister leh Tuichawng biala BJP ticket-a thlan tlin Dr BD Chakma te an ni a; an pahnih hian an duh vang rênga MLA candidate ni tawh lo an ni.

Kum 2018-a MLA atana thlan tlin, an tlinna bial kalsana kumina bial danga ding tur pathum an awm a; chu'ngte chu Lalrinliana Sailo, R Lalzirliana leh Robert Romawia Royte te an ni a, an pathum hian MNF ticket-a thlan tlin an ni.

Kum 2018-a Chalfilh biala thlan tlin Lalrinliana Sailo chu kuminah hian Mamit bialah a ding dawn a, Ṭawi biala thlan tlin R Lalzirliana chu Aizawl North-I bialah a ding tawh dawn a, Aizawl East-II biala thlan tlin Robert Romawia Royte chu Hachhek bialah a ding dawn.

Kum 2018-a MLA atana thlan tlin zinga pathum chu kumin 2023-ah hian political party dang aṭangin an ding tawh dawn. Chalfilh biala MNF ticket-a thlan tlin Lalrinliana Sailo chu BJP ticket-in Mamit bialah a ding dawn a, Congress party ticket-a thlan tlin KT Rokhaw chu a bial ngai Palakah MNF ticket-in a ding dawn. Saiha biala MNF ticket-a thlan tlin Dr K Beichhua pawh a bial ngaiah BJP ticket-in a ding dawn a; ani hi MNF aṭanga bàn a nih vanga party dang zawm ta a ni.