Saiha College zirtirtu sawn tawh sût turin SU-in sorkar an phût

Saiha College Students Union (SU) chuan October 17, Thawhlehni khan thuchhuah siamin, Saiha College-a English department assistant professor (regular) Lalrinpuii Rokhum sawn chhuah a ni chu an dem thu an tarlang a, October 20, 2023 (Zirtawpni) ral hma ngeia sawnna thupek sût an phût.

Saiha College SU chuan, an college-ah zirtirtu an indaih loh vanga pek belh tura hma an lak mek laia English department-a zirtirtu nghet pakhat J Thankima College-a sawn a ni chu hriatthiam harsa an tih thu an tarlang a, "Tun hnaiah English department aṭangin mi pathum an lak chhuahna a ni a, tunah hian regular teacher pakhatmah kan nei ta lo a, lungchhiatthlak kan ti tak zet a ni. Order hi October 20, 2023 ral hma ngeia min sûtsak loh chuan a ṭul angin hmalak a ni ang," an ti.

Saiha College SU tarlan danin, September 22, 2023 khan Higher & Technical Education minister Dr R Lalthangliana a pisaah hmuin, an college harsatnate an thlen a, zirtirtu indaih lohna leh Geography department hawn a nih theih nan hmalakpui turin an ngen a ni.