CSS hnuaia thawkte'n Special scheme an duh

All Mizoram CSS Employee Co-ordination Committee (AMCECC) chuan thuchhuah siamin, tupawhin sorkarna chang se an tana siam special scheme tihhlawhtlin nise an duhthu an tarlang.

AMCECC chuan Mizo­ram sorkar hnuaia CSS emplo­yee-te tan special scheme duan sak an ni chu lawmawm an tih thu tarlang­in, "Mizoram sorkar hnuaia CSS employee-te hi tun dinhmunah thawktu mi sing tel kan awm mek a, department hrang hranga scheme/project khawihtu ber niin, kum tam tak rim takin kan lo thawk tawh a ni," an ti.

An service chungchang ngaihpawimawh saka hma an sawn ve na tur Study Group dinin, Joint Consultation Committee siam a nih thu tarlangin AMCECC chuan, "Special scheme bakah hamṭhatna dang kan neih ve theihna tura ruahmanna min siamsak hi kan lawm hle," an ti a, a hlawhtlinna inthlan puan hma-a an hmu hman lo erawh pawi an tih thu an tarlang.

AMCECC chuan, 'Inthlan lo awm turah eng party pawhin sorkarna lo chang se CSS hnuaia hlawh tlem tak leh rimtaka thawkte hamṭhatna tur special scheme hi min tihhlawhtlin sak ngei turin kan ngen. Sorkarin special scheme min tih puitlin sak ngei theihna turin theihtawp kan chhuah zel," an ti.