KHAWTHLIR

YMA-in thisen pe

YMA, Chanmari West Branch chuan nimin khan Synod Hospital Blood Centre tan thisen unit 34 an pe a, petute mipa 27 leh hmeichhia pasarih an ni.

Candidate tur mi 161 puang tawh

November 7, 2023-a Mizoram State Legislative Assembly general election neih turah political party leh páwl hrang hrangin an candidate turte an puang tawh a, nimin thleng khan party pali leh pawl pakhatin candidate puang tawhin, chu'ngte chu mi 161 an ni. Vawiin hian Aam Aadmi Party chuan candidate puan an tum. Candidate puan tawhte chu Indian National Congress, MNF leh ZPM aṭangin mi 40 ṭheuh, BJP aṭangin mi 23 leh Lalpa Chhiahhlawh Intelkhawm aṭangin mi 18 an ni.

Sainik School an champion

Sainik School, Chhing­chhip chu All India Sainik School National Games 2023, Delhi-a neih zawh tâkah basketball-ah an champion. Champion ni tur hian Sainik School, Chhingchhip hian Intra Group-E Sainik School Competition 2023, Sainik School, Punglwa-a neihah an champion phawt a, East Zone aiawh turin All India Sainik School National Games 2023-ah tel zuiin, an champion a ni.

Bawrhsap kâwm

Doordarshan Kendra, Aizawl joint director Nampibou Marinmai chuan October 17, 2023 khan Mamit a tlawh a, DC pisaah district bawrhsap VL Remliana leh sorkar hotu dangte a kâwm. Nampibou Marinmai chuan, sorkar laipui hmalaknate Mizoram district hrang hranga kalpui dante uar zawka media kaltlanga puanzar a nih theih nan Mamit Bawrhsap chu thawhpuiah a sáwm a ni.

Zawh thei chin bituk

National highway No. 44A kawnga Darlak bailey bridge chu a hlui deuh tawh avang leh a chak ṭhat tawk tawh loh avangin Mamit SP Lalthangpuii Pulamte chuan lirthei ritphur zawh theih chin a bituk a, lirthei leh an thil phurh metric ton 12 aia rit tan he lei zawh khap a nih thu a tarlang.