Sem hmanga ram siam kan tum lo - Lalduhoma

ZPM leader Lalduhoma chuan, Mizorama Pathian ram a thlen theihna tur dâltu lian ber chu hlemhlêtna a nih thu leh, sem hmanga ram siam an tum lo a, thawhrimna hmanga ram tun din an tum thu a sawi.

Lalduhoma hian nimin khan Sialsuka Lalṭanpuia Hall-ah ZPM Aizawl South-III Joint Block Conference a hmanpuinaah thu sawiin, "Kan policy-te hi a taka tihhlawhtlin ngei theih chauh kan siam a, tihhlawhtlin theih loh tur kan sawi ve ngai lo. Sem hmanga ram siam kan tum ve lo a, thawhrimna hmangin kan ram hi tun din kan tum," a ti.

Ṭhalai zingah politics-a harh tharna a thleng nasa a, rorelna ṭha duhin an tuihâl thu leh nu leh pa pawhin ZPM-ah beiseina lian tak an nei nia sawiin Duhoma chuan, "Tunah chuan Pathian zarah sorkarna siam turin kan inpeih tawh. Kan mithiam rualte'n ni 100 chhunga tih tur, kum hnih chhunga tih tur, kum nga chhunga tih tur, chutiang zelin ruahmanna fel tak kan nei a ni," a ti a; an arkhawthimdai dawn loh thu a sawi.

Lalduhoma chuan, ZPM-in hmasawnna an aupui rualin, ram rorelnaa Pathian ram a thlen an duh tih sawiin, "Kan rama Pathian ram a thlen theih nana dâltu lian ber chu hlemhlêtna a ni. Eirukna hian kan rilru sûkthlêk a tidanglam nasa em em a, mipui pawhin ram roreltute rin mai harsa an ti tawh. Hemi siamṭha tur chuan 'Ka eiru lo ang' tia intiam ngam kan hmu tain kan hria. ZPM candidate-te hian Pathian leh Val Upa Council hmaah ka eiru lo ang tiin kan tiam vek a ni," a ti.

ZPM Leader chuan, political party pahnihin nasa takin ZPM an beih thu a sawi a; party naupang tak an ni chungin hmun hrang hrang aṭangin mi thar duhawm tak tak an neih thu leh ZPM zawmtute chu beiseina nei kal khawm an nih thu a sawi bawk.

Inkhawmah hian Aizawl South-III biala ZPM candidate tur Baryl Vanneihsangi Tlau, Serlui biala ZPM candidate tur C Lalthanfela leh AMC councillor Christina Roluahpuii Sailo te pawhin thu an sawi a; ZPM zawm thar mi 1,225 lawm luh a nih thu ZPM thuchhuah chuan a tarlang.