Champhaiah Museum Exhibition buatsaih

Mizoram State Museum chuan nimin khan Champhaia Gandhi Memorial High School-ah Museum Exhibition leh Awareness Campaign an buatsaih a, district bawrhsap James Lalrinchhana'n a hawng.

James Lalrinchhana chuan, Champhai district chu pi pute sûlhnu pawimawh tak tak awm tamna a nih avangin museum chungchang inzirtir a pawimawh thu a sawi a, "Hnam ropui tak takte ropui chhan chu an ṭobul an hriat chian vang a ni a, hnam rohlu leh thil hlute an dah pawimawh tlat vang a ni," a ti.

Competitive exam-ah mahni culture leh history hre lo tan tlin theih a ni lo tih sawiin Bawrhsap chuan, "Culture tidal thei tam takte'n inchîmralna a thlen nasa a, ṭhangthar leh zirlaite'n in ṭobul, pi pute sûlhnu zir chian nachang in hriat chuan Mizo hnam hi chimralna tur lakah a veng dawn a ni," a ti a; Champhai district chu ruihhlo tawlhna hmun, golden triangle kalkawng a nih avangin ruihhlo lakah fimkhur turin zirlaite a chah.

Mizoram State Museum curator C Lalrinfela chuan, GM High School chu Mizorama sikul zinga museum nei hmasa ber a nih avangin Museum Exhibition an buatsaih tih a sawi a; museum chuan hmànlai aṭanga hnamin thil hlu a neihte hlutna pho chhuah chu a tum ber a nih thu a sawi bawk.