ZPM-in Ṭawngṭai Retreat an buatsaih

ZPM General Headquaters-a Ṭawngṭai Committee chuan nimin khan YMA, Serchhip Sub-Headquarters hall-ah Ṭawngṭai Retreat an buatsaih. He hunah hian ZPM leader Lalduhoma chuan, ZPM an sorkar a nih chuan an eiru dawn lo a, mipui an tithlâwn dawn lo tih a sawi.

ZPM Ṭawngṭai Retreat hi Ṭawngṭai Committee chairman Rev. Darchungnunga'n a kaihruai a, Rev. Biakthansanga’n hunserh a hmang a, ṭawngṭaihona hun hman a ni. Lalduhoma bakah, ZPM vice president Rev. Dr K Thanzauva ten thu an sawi.

Lalduhoma chuan, kohhranin corruption an vei hle a, corruption laka fihlim lote chungah kohhranin thuneihna nei lo mah se, corruption-a fihlîm lote chu rawngbawlna langsarah dah loh leh danin thiam loh a chantirte chu thunun rawtna hian a awm tawh tih a sawi a, "Eirûkna laka kan fihlim theih nana kohhrante hmalakna hi a lawmawm hle a ni," a ti.

ZPM Leader chuan, "ZPM candidate-te chuan ka eiru lo ang tiin kan tlangau mek a, mipui pawhin ZPM chungah rinna an nghat mek a, he an rinna nghah hi kan sorkar a nih chuan kan tithlàwn dawn lo a, kan eiru dawn lo," a ti a; ram hruaitute'n sorkar laipuiah sum sawi chhuak ṭhin mah se, anmahni bawkin an eiru leh ṭhin a, party worker ṭhenkhatten an pute eirûk an sawi màmsak ṭhin niin a sawi.

ZPM vice president Rev. Dr K Thanzauva chuan, Serchhip bial mipui rilru a ngheh avangin bialtu MLA Lalduhoma chu an phatsan mai a rin loh thu a sawi a, "Mizoramah kohhran ṭha tak kan nei a, hetiang taka kohhran inrêlbàwlna ṭha hi khawvel hmun dangah hmuh tur a váng. Politics huangah erawh kan ṭha lo a, hei vang hian thinlung zawng zawnga Pathian kan auh a hun a ni," a ti.