ZPM GS thusawiin MLA 5-te bànna thehluh ngai an nihzia a tichiang - MNF

MNF party chuan thuchhuah siamin, ZPM general secretary Eddy Zosangliana Colney-in October 17, 2023-a press conference a neihah, MLA pangate chu danin a phût anga MLA aṭanga bànna thehlut an nih thu a sawi chu MLA pangate dan kalhin an awm a, bànna thehluh ngai an nihzia a tichiang niin an tarlang.

MNF thuchhuah chuan, "Dan phût anga bàn ngai si, dan hmanga Pu Lalduhoma ban a nih hnu khan engati nge an bàn ve mai loh? Bàn tura nawr zui ngai loa bàn nachang hre pha chin tura beisei an nih lai a, independent MLA ni chunga ZPM party office-a kal reng, an party thil tihna zawng zawnga phusa, MLA hamṭhatna zawng zawng an hmuh zawh vek hnua Model Code of Conduct-in a phuar tâk hnua báng ta chauh an ni hian dan kalha hamṭhatna dawngtu nih an hreh lohzia a pho lang chiang hle a ni," a ti.

ZPM kalphung thar zawrh chu mipui bumna nia sawiin, mipuiin an lakah rinhlelhna an neih avangin an bumna thanga âwk tawhte pawh an tâl chhuak mek zel niin MNF chuan an tarlang a; tuna la tangkhang mekte pawh MNF-ah lut zel turin an sáwm a ni.