MLA inthlan atan inbuatsaih zel

November 7, 2023-a MLA inthlanpui neih tur atan nimin khan Lunglei, Siaha, Champhai, Kolasib, Lawngtlai, Khawzawl leh Hnahthial district-ah Bawrhsap tinte kaihhruaiin electronic voting machine (EVM) leh voter verifiable paper audit trail (VVPAT) hmanruate thliar fel hna (randomization) thawh khatna neih a ni a; poltical party aiawhten an telpui a ni.

Lungleiah chuan DC conference hall-ah neih a ni a; bawrhsap Ramdinliani chuan, "Election Commission of India hi EVM chungchangah hian a fimkhur em em a, a fair tur chauh a ni lo a, a lang fair bawk tur a ni, tih hi a thupui a ni," a ti.

Lunglei district-ah hian balloting unit 256, controlling unit-250 leh VVPAT 275 a awm a, polling station 176-a hman tur 176+ Reserve 20% (of PS), BU leh CU bakah, 30% ( of PS) VVPAT-te an hmang dawn a ni.

Siaha DC Lalhmunsanga Hnamte kaihhruaiin EVM leh VVPAT randomization neih a ni a; he hunah hian EVM leh VVPAT hmanruate a hmanna tur polling station duhthlan bik awm loin Election Commission of India-in ruahmanna a siam tawh angin khawl hmanga siam a ni.

Champhaiah chuan NIC conference hall-ah EVM leh VVPAT randomization neih a ni a; balloting unit (BU), controlling unit (CU) leh VVPAT inkawp turte thliar fel a nih bakah, an hmanna tur Constituency-te pawh thliar fel nghal a ni. BU leh CU-ah te hian reserve 20% dah niin, VVPAT reserve 30% dah a ni bawk.

Kolasib district-a hman tur EVM first randomisation hi DC video conference room-ah bawrhsap John LT Sanga kaihhruaiin neih a ni a; first level checking (FLC) endikna aṭanga EVM hman theih tura dah hran sate chu a hmanna tur Constituency tih fel a ni. EVM hman tur hi Kolasib district-a polling station 89 atan set 89 (CU, BU leh VVPAT) bakah, thlavenga dah hran CU 16, BU 16 leh VVPAT 25 thliar fel a ni.

Lawngtlai district-ah chuan District Election Officer kaihhruaiin neih a ni a; polling station 70 awmna Tuichawng AC-ah EVM 84 leh VVPAT 91 ruahman a ni. Polling station 69 awmna Lawngtlai West AC-ah EVM 83 leh VVPAT 90 leh, polling station 42 awmna Lawngtlai East AC-ah EVM 51 leh VVPAT 55 ruahman a ni.

Khawzawl DEO K Lalrohlua hoin Tuichang AC-a hman tur EVM first randomisation neih a ni a; Khawzawl district Strong Room-ah hian EVM balloting unit 50, control unit 57 leh VVPAT 48 a awm.

Hnahthial DC pisaah EVM hmanruate thliarfelna neih a ni a; polling staion 27-a hman tur EVM 60 aṭangin control unit 32 (27 PS + 5 reserve), ballot unit 32 (27 PS + reserve) leh VVPAT 35 (27 PS + 8 reserve) thlan chhuah a ni.