Ngaihtuahna kan her rem thiam chuan entawntlak hmasawnna kan lantir thei - Chief Minister

Chief Minister chuan, Mizoramin kawng hrang hrangah hmasawn theihna a neih thu sawiin, "A chhunga cheng mihringte'n kan ngaihtuahna kan her rem thiam chuan kan ṭhenawm state-te tana entawntlak hmasawnna kawng hrang hrangah kan lantir thei a ni," a ti a; mahni zawn ṭheuha tih tur leh tih theihte hlen tum turin mipui a sáwm.

Zoramthanga chuan, ei leh bara intodelh mai bakah, hralh chhuah tur te, eizawnna hrang hrang dap chhuahte leh infiamna khawvelah ram chhung leh ram páwna lang pha Mizoramin a nei a, a la neih zel tur thu a sawi a, "Sorkarin theihtawp chhuahin hma a la zel ang a, taimâkna leh tum­ruhnain a zui chuan hlawh­tlinna a awm ngei ang," a ti.

Khualzahawm Robert Romawia Royte, Sports & Youth Services minister chuan, lungphùm phùm tâkte peih a nih hunah chuan West Phaileng khua mai bakah, a chhehvel khuate'n ṭangkai taka an hman ngei a beisei thu a sawi a; project-te a nihna tur ang taka zawh a nih theih nan a sak hna thawktute enpuia thawhpui turin tualchhung mipui a chah.

Lungphùm inkhawm hi Sports & Youth Services secretary H Lalengmawia'n a kaihruai a; bialtu MLA Lalrintluanga Sailo, govt. deputy chief whip pawhin thu a sawi.

Inkhawma tarlan danin, Mizoram sorkarin Residential Sports School atan cheng nuai 1,478.85 leh Smart Classroom atan cheng nuai 8.77 sorkar laipui aṭangin a dawng tawh.

Project-te hi Sports & Youth Services department kaltlanga Ministry of Minority Affairs hnuaia Pradhan Mantri Jan Vikas Karyakram (PMJVK) aṭanga sum hmuh hmanga din tur a ni.

CM-in lungphùm a phùmte

•    Residential Sports School - cheng nuai 3,286.34

•    Community Centre (Sadbhav Mandap) - cheng nuai 140

•    Smart classroom - cheng nuai 17.54