Medical college-a zirtirtu ni thei tur Mizo zingah an awm - Health Minister

Health minister Lal Thanzara chuan, State Referral Hospital-a medical college, Mizoram Institute of Medical Education & Research (MIMER) din tum chu tihhlawhtlin ngei an tum thu sawiin, "Zirtirtu ni thei tur pawh Mizo zingah an awm," a ti.

Lal Thanzara hian nimin khan CMO conference hall-ah MIMER din tur chungchang press mite a hrilhfiah a; medical college din tum vangin Aizawl Civil Hospital (ACH) tihtêt tumna a awm lo tih sawi nawnin, "Medical college tihpuitlin ngei kan tum a, zirtirtu tur pawh department tinah Mizo ngei an awm thei ang," a ti a, zirtirtu mamawh ang zat Mizoin an daih lo a nih pawhin, state dang aṭang pawhin an awm thei thu a sawi.

Medical college din tura sorkar hmalakna chu MNF party-te tan hmuh hrehawm tak a nih theih thu sawiin, Lal Thanzara chuan, "Hetianga chak taka kan bawhzui hi an tan chuan hmuh a hrehawm hle ang. MNF tih kha chhunzawm ila chuan, Referral Hospital hi kohhran pakhat kutah a awm loh pawhin ár kan ngah hle ang. An party worker-te induhsak nan an hmang a, party worker hna hmute aṭangin an party tan sum an khawn," a ti.

Zawhna chhangin Minister chuan, MIMER din tum chu sorkar laipui ta tur ni loin, Mizoram state sorkar ta tur a nih thu a sawi.

Health Minister chuan, ACH chu khum 300 awmna anga chhàl ni mah se, a tak takah chuan khum 300 a len loh thu sawiin, "A chêp em em a, zun-in bulahte khum dah a ni. Tihtet ni loin, tihchangtlun kan tum zawk," a ti. ACH chu district hospital (khum 200 awmna) atan puan ni tawh mah se, khum 250 vel dah tum a nih thu a sawi.

Health Minister-in ACH titê loa tihchangtlun mek zel a nih dan sawi danin, Dental department tan operation theatre siam thar a ni dawn a, khum paruk dah a ni ang. Cardiology ward-ah khum 10 dah belh a ni a, upa ward zauhna turin khum 10 dah belhna tur siam mek a ni. Trauma Centre tur sak mek a ni a, khum 10 dah a ni dawn a, Trauma Centre building sak zawh hunah ICU awmna sawn tum a ni.

Dialysis khawl awm sa pahnih bakah pahnih dah belh a ni a, nausen upna panga dah belh thar a ni. Ward dang pawh tihchangtlun a ni a; Medical Council of India pawmpui angin ACH-ah doctor-te internship leh post graduate training kalpui zel a nih dawn bakah, nursing training centre a la ni zel ang.

Zawhna chhangin Lal Thanzara chuan medical college chu state sorkar enkawl tura ruahman phawt a nih thu sawiin, "Medical college dang nena thawhho tumna kan nei hrih lo. Harsatna kan tawka thawhpui theih an awm a nih chuan kan be hreh lo ang," a ti.