Insumdawn tawnna tur enfiah

Commerce & Indus­tries minister Dr R Lal­thang­liana chuan, nimin khan Bangladesh nena insumdawn tawn­na tura ruahman Kawrpuichhuaha Integrated Check Post (ICP) a tlawh a, hmalak dan a enfiah.

Kawrpuichhuah ICP atana hmalakna chu a rang thei ang bera tih hlawhtlin a nih theih nan Commerce & Industries Minister leh Ministry of Home Affairs hnuaia Land Ports Authority of India (LPAI) hotute chuan ruahmanna an siamho a; LPAI hi Ministry of Home Affairs hnuaia sum­dawnna hmun (trade centre) dintu leh enkawltu an ni.

Dr R Lalthangliana chuan, ram economy ṭhan len zelna turin ram dang nena insumdawn tawnna tihhmasawn a pawimawh tih a sawi a, "Hemi kawnga kan hmasawnna turin Kawrpuichhuah, Zokhawthar, Zocha­chhuah leh border haat kan neihte chu Mizoram sorkarin a tichangtlung zel dawn a ni," a ti. 

Kawrpuichhuah leh a chhehvel chu sumdawnna kawngka (trade corridor) pawimawh tak a la ni zel dawn tih sawiin R Lalthangliana chuan, "Hei hian kawng hrang hrangin hmasawnna a la thlen zel dawn. Kawrpuichhuah kaltlanga border trade tihlawhtling tur hian Bangladesh sorkar a inhawng hle a ni," a ti a; sumdawnna hmunpui tihlawhtling turin Tlabung leh a chhehvel mipui chu hmalakpuiah a sáwm.

LPAI director Col. Raman Kumar Sharma pawhin thu sawiin, "Kawrpuichhuah ICP tihhlawhtlin thuai sorkar laipuiin a duh. December 17, 2020 hian he lai hmuna hmalakna chipchiar zawka rawn zir chiang leh turin LPAI aṭangin consultant pahnih an rawn kal leh dawn. Border trade tihlawhtling turin a chhehvela cheng mipui an pawimawh hle," a ti.

Kawrpuichhuah ICP dinna tur hian kum 2005-ah Rites Ltd. ten Home Ministry hnenah survey report an thehlut a, ram bigha 224.99-a zau lâk (acquire) a ni. India leh Bangladesh inkalpawhna tiawlsam turin Kawrpui lui (Theka)-ah lei (RCC double lane bridge) siam tum a ni a, chumi atan chuan Mizoram PWD-in January 17, 2020 khan Ministry of External Affairs-ah cheng vbc. 230.01 hû DPR an thehlut a ni.