Power man pawisa 33-a tihsan dil

Power & Electricty department-in Joint Electricity Regulatory Commission (JERC) for Manipur and Mizoram hnena kum 2016 atana power tariff tihsan a dil chungchangah nimin khan IPR conference hall-ah public hearing neih a ni. Kawlphetha hman man chu unit khatah pawisa 33-a tihsan tum a nih thu an sawi.

Public hearing-ah hian P&E depart-ment chuan tariff tihsan an dil chhan sawifiahin, tihsan tumna chu chawhrualin 8.21% a nih thu an sawi a, "Tariff tihsan a nih hnu hian unit khat zelah pawisa 33-in a sang dawn. Tariff tihsan a nih chuan kum 2016-17 chhungin consumer-te hnen
aṭanga kawlphetha hralhna revenue cheng vbc. 166.18 hmuh theih rin a ni. Kum 2015-16 aia hmuh tamna tur chu vbc. 12.47 a ni ang," an ti.

P&E department hotute sawi danin, kawlphetha pek nana kum 2016-17 chhunga sum ngai zat, aggregate revenue requirement (ARR) cheng vbc. 252.93 hmu let turin unit khat man Rs. 2.21 vel zela tihsan a ngai a; mahse, chutianga tihsan a nih chuan consumer tan phurrit a ni thei a, chuvang chuan unit khatah pawisa 33 ang zela tihsan tum a ni.

Tariff tihsan a ni chung pawhin cheng vbc. 84.75-in ARR a la pha dawn lo a, a phâk lohna chu sorkarin a peksak a ṭul dawn. An beisei dan chuan, consumer-te hman bak NERLDC kaltlanga state dangin an hman aṭangin cheng vbc. 2.34 vel revenue hmuh beisei a ni.

State sorkar chuan ARR a phâk lohna cheng vbc. 82.41 chu mipui tan subsidy-in a peksak turah ngaiin, tariff tihsanna tur chu 8.21% a ni ang.

Public hearing hi JERC hotu Lalchharliana'n a kaihruai a; P&E hotute bakah, Central YMA, MCU, MHIP, MUP leh Mizoram Chamber of Commerce & Industries aiawhte an tel a ni.