Kristian Ṭhalai Pawl Day hman a ni

Nimin, February 16 kha Kristian Ṭhalai Pawl din champha, KṬP Day a ni a, hmun hrang hranga KṬP branch-te'n an hmang.

KṬP Day pual hian branch tam tak chu an khua/veng chhung leh biak-in leh a chhehvelte tifaiin an hnatlang a, branch tinin an biak-inah KṬP flag an zâr. Branch eng emaw zat chuan bethel hun an hmang bawk.

KṬP Day pual hian Synod Hospital tan Leitan Ramthar branch leh Muana Veng branch-te'n thisen an pe a, Leitan Ramthar branch member mipa 12 leh hmeichhia pahnihin pe in, Muana Veng branch member mipa paruk leh hmeichhia pahnihin an pe a ni.

Mamit Bazar Veng branch pawhin KṬP Day pualin Mamit District Hospital tan thisen unit 17 an pe a, a petute mipa 13 leh hmeichhia pali an ni. Kolasib Vengthar branch pawhin Kolasib District Hospital tan thisen unit 27 an pe a, a petute mipa 21 leh hmeichhia paruk an ni.

KṬP Day hi nikum thleng kha chuan February 22-ah hman ṭhin a ni a, Synod Inkhawmpuiin KTP Day chu February 16 a nih thu a puan hnuah, kumin aṭangin February 16-ah an hmang ta a ni.