Kum 2015 chhungin TB avangin Mizoramah mi 38-in nunna an chan

Nimin khan Health Worker Training School auditorium, Kulikawnah ngawr natna (tuberculosis) enkawlna chungchang thlirletna, 4th Quarter Review Meeting 2015 neih a ni a; kum 2015 chhung khan TB vei zinga 84% enkawl dam an nih laiin, TB vangin mi 38 an thi tih an tarlang.

Meeting hi National Health Mission (NHM) mission director Dr K Lalbiakzuala'n a kaihruai a; Dr K Lalbiakzuala chuan, TB venna atana pawimawh ber chu a veite hmuhchhuah hmaa enkawlna pek thuai a nih thu leh TB veite hmuhchhuah kawnga nasa zawka ṭan lak a ṭul thu a sawi.

State TB officer Dr Vanlalfela'n TB veite enkawlna tur CB-NAAT khawl Champhai leh Lunglei district-a dah thuai tur a nih thu a sawi a; Mizoram State TB Control Society-a medical officer Dr Vanzarliana leh DR-TB Centre-a medical officer Dr Albert Lalhminghlua ten district tina TB vei hmuhchhuah leh enkawl te, MDR-TB vei enkawlna chungchangahte an sawifiah.

Dr Vanlalfela'n report a pek danin, kum 2015 (January-December) chhung khan Mizorama TB vei nia rinhlelh endik mi 9,658 an awm a, chung zinga mi 2,088 chuan TB an vei tih hmuhchhuah niin, chu'ng zinga 84% chu enkawl dam an ni. TB leh HIV vei kawp mi 177 hmuhchhuah niin, MDR-TB vei 47 hmuhchhuah a ni a; TB vangin mi 38 an thi a ni.

Meeting-ah hian district tina TB officer-te leh RNTCP accountant leh DEO-te an tel a, Health Services joint director Dr Vanlalhruaii a tel bawk. Meeting hi vawiin leh naktukah chhunzawm a ni ang a, Project Implementation Plan (PIP) 2016-17 buaipui a ni ang.