Minister-te'n ar awpkeuna tur enfiah

Social Welfare minister PC Lalthanliana leh AH&Vety minister C Ngunlianchunga chuan February 15, 2016 khan Lawngtlai khaw bul, Mampui khuaa AH&Vety Farm-a Chicken Hatchery siam thar tur an tlawh.

PC Lalthanliana chuan, ár notê phai aṭanga lak luh a tam ṭhin thu sawiin, "Chhim lama chengte tan phei chuan ar note hmuh a harsa ṭhin. Chutih laiin, a kum têlin mamawh a pung zel si a, kan mamawh keimahni ngeiin kan thar chhuah ve theih nan sorkar chuan hma a la a ni," a ti a; rei lo têah Lawngtlaiah ngei ar note lei tur a awm a beisei thu a sawi.

Sorkar laipuiin Grant Under Article 275(1) aṭanga Mizoram tana ṭanpuina a pek hmangin nodal department, Social Welfare chuan AH&Vety department enkawl, Mampui hmuna ár awpkeuna hmunpui siamna turin cheng nuai 125 a ruahman a, a sak dan tur ruangam leh a hmun turte Minister pahnih hian an enfiah a ni.