Thingsaia sikul zawng zawng khâr dawn

Thingsai khuaa political party leh tlawmngai pawl zawng zawngte ṭangrual chuan an khaw high school leh middle school pahniha headmaster leh science zirtirtu dah tura sorkar an phutna tihhlawhtlin a nih loh avangin vawiin aṭangin Thingsaia sikul zawng zawng an khâr dawn.

Thingsai Joint NGO & All Party thuchhuah chuan, Thingsai H/S-ah hun rei tak science zirtirtu an nei lo a, M/S pahnihah headmaster an nei lo bawk tih an tarlang a; December 30, 2015-a sorkar hotute hnena an thlen ṭumin, School Education minister Rohluna'n February 15, 2016 thleng lo ngaichang turin a ti nia sawiin, "Eng thu mah a sawi loh thu min hrilh leh ta si a ni," an ti.

An tarlan danin, Thingsai M/S-ah kum 2012 aṭangin headmaster an nei lo a, Saikuti M/S-ah phei chuan kum 2008 aṭanga tun thlengin headmaster an nei lo.

Thingsaia sikul khâr an tum hi tiamchin awm lo a ni a, chuti chung pawha a hlawhtlinna an hmuh loh chuan hmalak zel an tum a ni.