Medical college din dan tur sawiho

Health department hotu liante chuan nimin khan Chief Minister’s Office conference hall-ah Health minister Lal Thanzara hoin Mizorama medical college din tur chungchang an sawiho a, hmalak zel dan tur an rél.

Health Minister chuan, State Referral Hospital tihchangtlun hna chak taka thawh mek a nih thu sawiin, "Medical Council of India phut hrang hrang phâk thuai tuma ṭan lak a ni. Medical college nei tur hian hospital-ah khum 250 tal a awm tur a ni a, chawhrualin ni tin damlo 400 talin Out Patient Department an pan tur a ni tih a nih avangin thawktu doctor leh staff dah belh zel an ni. Damlo pantu pawh an pung chak hle," a ti.

Meeting-ah hian doctor kalkhawmte chuan an hmazâwn ṭheuha hma an lâk dante sawiin, rawtna an neihte sawiho a ni a; medical college-ah seat 100 awm tura rawtna leh chu'ng zinga seat 15 chu sorkar laipui chan tura dah rawtnate pawh a awm a ni.

Meeting-ah hian Health secretary Lalrinliana Fanai, principal director Dr K Ropari, Hospital & Medical Education director, Health Services director, Aizawl Civil Hospital medical superintendent Dr Rosangluaia leh officer dang eng emaw zat an tel.