Lawngtlaiah sorkar laipui hmalakna sawiho

Lawngtlai District Level Vigilance & Moni-toring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm.

CL Ruala chuan, sorkar hnathawkte chu sorkarin a mipuite dâwm-kan a tumna sum leh pai a taka hmanga enkawltu an nih avangin sorkar innghahna an nih thu a sawi a, "Sorkar laipui lamin meeting hi a ngai pawimawh a, member kal dan thlengin an lo en chîk ṭhin. Meeting report pawhin a hun takah Delhi a thlen a ṭul a, chutiang a nih loh chuan fund pek chhuah thlengin kan tawrh phah thei," a ti.

Ronald Sapa Tlau pawhin thu sawiin, sorkar hna aṭanga kan hahchawlh hnu pawha kan thinlung tilawm veng vengtu tur hnathawh ṭha neih tum ṭheuh turin member-te a sáwm a, "Member-te'n hna an thawh ṭhat chuan Mizoram chuan hna a thawk ṭha a ni mai," a ti a; sorkar hnathawkte kutah ram hmélhmang leh hma lam hun chu a innghat tlat tih hre turin member-te a fuih.

Meeting-a tarlan danin, October, 2015 leh February 15, 2016 inkarah MGNREGA hnuaiah cheng nuai 1714.24 hmuh a ni a, ni 25 inhlawhna siam a ni tawh. IAY sum in 95 sakna tur hmuh a nih bakah, IAY dawng tur waiting list nghet siam a ni.

IWMP hnuaiah Lawngtlai district chhung-ah project 17 kalpui mek a ni a, mahse, tun reporting period chhungin sum hmuh a ni rih lo.