Zirlai mahni intodelhte hnenah SSU-in chawimawina an hlân

Students’ Self-Support Union (SSU) Gen. Hqrs. chuan zirlai ni chunga mahni intodelh leh inchâwm kawnga ti ṭhate hnenah December 14, Thawhṭanni zan khan Ignite Studio-ah Self-Support Award an hlân. He hun hi School Education minister Lalchhandama Ralte-in a hmanpui a, zirlaite hnenah chawimawina a hlan a ni.

Self-Support Award hlanna inkhawmah hian School Education Minister-in thu a sawi bakah, SSU general secretary Darhmingliana'n inlawmna thu a sawi a, SSU president Lalnunhlima'n thu a sawi bawk.

Minister Lalchhandama Ralte chuan, SSU-in zirlai mah­ni intodelhte hnenah chawi­mawina an hlàn ṭhin chu lawmawm a tih thu sawi­in, hun kal zelah pawh chhun­zawm zel turin a chah a; "Mizote'n kan mamawh em em chu intodelh a ni," tiin, zirlai­te chu mahni intodelh nan thawh hreh nei lo turin a chah.

Self-Support Award dawngtute

1.    Lalrinawma s/o Thangchungnunga (L), Ngopa, Mission Vengthlanga chêng mek. MZU-a M.A (History) 3rd semester zir mek a ni a; a pain a thih san tawh a, a nu a cancer mek. Lehkha zir chungin inhlawhna remchang ang ang a thawk ṭhin a, amah leh an chhungkua a enkawl.

2.    Malsawmhlui d/o Lalringzuala, Ramhlun Sports Complex. Hrangbana College-a B.Com. 5th semester zirlai. Chhungkaw harsa tak an ni lo chungin pawl 8 a nih lai aṭangin mahni intodelh tumin a theih ang angin a inhlawh ṭhin; insûk leh nau awm, mi dawra inhlawh, etc. Kum 2018 aṭangin Mizo Hnam Runah computer operator a ni.

3.    VL Malsawmtluanga s/o Vanlalvena (L), Johnson College-a B.A 3rd semester zirlai. A pa a thi tawh a, unaua upa ber a nih avangin an chhungkua a enkawl a ngai a, a remchan ang angin a inhlawh a, driver hna a thawk ṭhin bawk.