SSA-a hnathawk mahni post-a awm lo chhui turin Governor-in CS a hrilh

Governor Lt.Gen. Nirbhay Sharma chuan, SSA Mission hnuaia thawk, an awmna hmun (post)-a awm lote chhui chiang a, a ṭul anga hma la turin chief secretary Lalmalsawma a hrilh.

Larsap hian February 2, 2016-a Mamit a tlawh ṭumin tlawmngai pawlte'n Mamit district-a SSA hnuaia thawk tura tih mi 42-te chu Mamit district chhunga an awm loh thu an lo hrilh a; district hnufual an nih laia an district-a thawk tura tihte an awmna tura an awm lo chu harsatna an tawh phah thute an lo thlen a ni.

NGO-te thu thlen chungchangah hian Larsap chuan SSA hnuaia thawk, an awmna hmuna an awm lo tih a hria chu pawi a tih thu a sawi a, "Eng vanga an hnathawhna hmuna awm lo nge an nih lo en chian thuai ka tum ang," tiin a chhang a ni.

Vanglaini thu dawn danin, Governor hian tun hnai khan a Secretary kaltlangin Chief Secretary hnenah lehkha a thawn a; SSA-a thawk, Mamit district-a awm tura tih, Mamit district-a awm lote chu chhui chiang a, a ṭul anga bawhzui turin a hriattir a ni.

Governor Secretary chuan a lehkha-thawnah chuan, "Governor leh khawtlang mipuite inkawmnaah SSA hnuaia zirtirtu leh hna dang thawk Mamit district-a thawk tura tih district pâwnah sawn an ni tih sawi chhuah a ni a. Hei hian sikulah harsatna a thlen a ni," tiin a ziak.

Hetih lai hian, Chief Secretary hian Governor lehkhathawn hi a la chhang lo nia thu dawn a ni.

SSA-a thawkte chungchang bakah hian Governor Secretary hian Larsapin Mamit district a tlawh ṭuma a thil ngaih pawimawh dangte pawh Chief Secretary hnenah a thlen tel bawk niin thu dawnna chuan a sawi.