Mizorama tlang ram lo neih bânsan A nih theihna atan ṭan kan la: FAO

Food and Agriculture Organisation (FAO) palai Shyam Khadka chuan, Thawhlehni khan Ṭhiak khuaa Horticulture Centre of Excellence a tlawh a; Mizorama tlang ram lo neih kalsan a nih theihna atan ṭan an lak thu a sawi.

Shyam Khadka chuan, Horticulture Centre of Excellence chu Mizorama horticulture tihma-sawnna tur pawimawh tak a nih thu sawiin, "Mizorama thingtlang lo neih dan pang-ngai a theih ang anga kalsan a, terrace leh ram-ngaw tam zawk siam a nih theih nan FAO-in hma a la mek. Mizoram aia ram chhengchhia leh ruahtui dawng tlem zawk pawhin buh leh bâl, thei leh thlai tam tak an thar theih chuan Mizoram hian chhuanlam tur a nei lo," a ti.

Ram leilung leh tuihnàte humhalh leh ruahtui khawl a pawimawh thu sawiin Shyam Khadka chuan, "Lei aṭanga ma-mawh la chhuak ringawt lo a, lei hi a mamawh pek let ve a ngai," a ti a; ran êk leh thlai hnah ṭawih aṭanga leiṭha siamte hman uar a pawimawh thu a sawi.

Sorkar thuchhuah tarlan danin, Ṭhiaka Horticulture department hmalakna hi chhungkaw 90 velin chhawrin, tlang ram lo neih an titawp a, huan thlai chìn lamah an inlet tawh a ni.

FAO palai hian FAO leh Agri-culture department hmalakna, Mizo Sloping Agricultural Land Technology (MiSALT) trainer turte training neihpui mek chu a hmunah a tlawh nghal a; FAO senior consultant Antonio Paliwal-i chuan an inzirtir dan hrilhfiahin, Mizoram leilung leh a mi chengte sûkthlêk mila engkim kalpui a nih thu a sawi.

Training-ah hian ATMA, Agri-culture, Horticulture, Soil & Water Conservation department leh All Mizoram Farmers’ Union (AMFU) aiawhte an tel a ni.