Thenzawl JNV zirlaite'n kawng an zawh

Thenzawla Jawahar Navodaya Vidhyalaya (JNV) zirlaite chuan, an principal JC Lalsagzuala leh zirtirtu Zorampari leh LDC Ricky Lalzawma te bàn phûtin nimin khan Thenzawlah kawng an zawh.

Thenzawl JNV zirlaite hian an principal JC Lalsangzuala chu kawng hrang hranga a mawhphurhna hlen loah puhin, báng turin an phût a, zirtirtu Zorampari leh LDC Ricky Lalzawma te chu zirlai hmeichhe chunga mawi lo taka an khawsaa puhin báng turin an phût thung.

JNV, Thenzawla zirlai 300 chuangte chu an thil phût puanzar nan nimin khan hostel
aṭanga chhuakin, an sikul aṭang-
in Thenzawl khaw chhungah kawng an zawh a; thuziakte an ken bakah, an au rual a ni. JNV zirlaite buaina chungchang a hmuna enfiah turin Serchhip DC chuan Serchhip BDO, Thenzawl SDO(C) leh SDPO-te a tîr a ni.

Kawngzawh hnuah Tual-vungi Hall-ah MZP sub-headquarters, Thenzawl leh JNV Parents Teachers' Association hruai-tute nen thil awmdan an sawi-ho a; resolution pass in, prin-cipal, zirtirtu leh LDC-te chu chawlh-kar khat chhung ngeia bàn an phût thu te, an bàn hma chuan chaw ngheia nawrhna huai-hawt zel an tum thute an tarlang.

JNV zirlai hruaitute chuan, an harsatna tawh chu hun rei tawh tak aṭanga inup tawh irh chhuak ta a nih thu leh, an thil phût a hlawhtlin hma chuan sikula luh an ngam tawh loh thu an sawi. Zirlaite sawi danin, an principal chuan zu rûi chungin zirlaite hauh, vau leh hremte a ching a, mess (ei leh bar)-ah JNV dangte an tluk loh bakah, zirlaite chu an tih tur ni lo inthiarna leh sikul hmunte a tihfaitir ṭhin a ni.

Zorampari leh LDC Ricky Lalzawma te chu inthuruala zirlai chunga mawi lo taka khawsa a, zute inpui leh mipat hmeichhiatna thila che mawi loah an puh.

Thenzawl JNV principal JC Lalsangzuala chuan zawhna chhangin, zirlaite'n an puhnaah thil felhlel leh dik lo awm theia a hriat thu leh zirtirtu tute'n emaw an fuihpawrh nia a rin thu a sawi a; an harsata chu dawhkâna chinfel theih a nih a beisei thu a sawi bawk.