Thu dik lo sawiah Minister John-a puh

MPC party ṭhalaite chuan thuchhuah siamin, sorkarin lirtheia lifetime tax a lak zat tur chhûtna tur chungchanga Transport minister John Rotluangliana thu sawi chu thu dik lo a nih thu an tarlang.

MPCY chuan, sumdawnna lirthei (maxicab, taxi leh auto-rickshaw) aṭanga road tax kum 15 atana February 2, 2016 aṭanga lak thar leh tâk leh, sumdawnna lirthei ni lote lifetime tax lak zat tur tehna atana lirthei thar man aṭanga 6% lak tur tih thu, Transport Minister-in a sawi chu Constitution a hriat lohzia tichiangtu a nih thu an sawi.

MPC ṭhalaite chuan, "Road tax hi state list-a mi, state thuneihna liau liaua awm a ni a, sorkar laipuiin la turin min tia a sawi hi mipui bumna leh mipui engahmaha min ngaih lohna a ni," an ti. Congress sorkarin mipui ngai pawimawh se chuan, mipui nawlpui nghawng thei thilah chuan mipui ngaihdan lak tur a nih thu sawiin, "Final notification chhuah chauh tura beisei an nih laiin, 6%-a order an chhuah thut mai hi mipuite VIP an nih lohzia a tichiang hle," an ti bawk.

MPCY tarlan danin, Mizoram sorkarin lirthei chhiah lifetime tax lak zat tur chhût nan a thar man aṭanga 6%-ah a tihsan laiin, hmar-chhak state dangah chuan 2%, 3% leh 5%-te a ni.