Champhaiah ATMA hmalakna thlirho

Champhai District Agricultural Technology Management Agency (ATMA) Governing Board chu, nimin khan an chairman Vanlalngaihsaka, Champhai DC hoin DC conference hall-ah an ṭhukhawm.

Vanlalngaihsaka chuan, ATMA hmalaknate chu district chhunga kut hnathawktute tan malsawmna a nih theih thu sawiin, "Tuna hmachhawpte hian thlai leh ran enkawl dana thiamna leh kalphung thar ṭha zawkte mipui zirtira vawrh lâr leh inhrilhhriat a tum ber a ni," a ti a; line department-te chu zirtirna pek kawngah ṭhahnemngai turin a chah.

ATMA project director RK Nithanga chuan, Extention Work Plan-in a tum ber chu kut hnathawktute'n thlai leh ran an enkawl aṭanga hlâwkna tam zawk an hmuh theih nan tunlai thiamna hmanga kalphung thar hmuhchhuahte kut hnathawktute hnena chhawp chhuah leh a hman dan zirtir a nih thu a sawi.

Meeting-ah hian kumin 2015-16 atana hmalakna tur district chhung block palia thawh tur Block Extension Work Plan chu sawiho a nih hnuah pawm a ni.

ATMA hnuaiah hian district level-ah ATMA Governing Board (Apex body) bakah ATMA Management Committee (Executive body) leh District Farmers' Advisory Committee an awm a; Block level-ah chuan Block Technology Team leh Block Farmers' Advisory Committee an awm thung.

Village level-ah khaw pahnih ṭheuh enkawl turin farmers friend 50 ruat an ni a; anni hian kut hnathawktute hmalakna leh harsatnate district level-a hotute hrilh-sak a, office lama thawh tur siamte kut hnathawktute hnena hril leh chhawnte an mawh a ni.