January 15-ah sikul kal theih beisei

School Education minister Lalchhandama Ralte chuan nimin khan Khawzawlah district education officer (DEO) pisa leh Samagra Shiksha district project officer (DPO) pisa a hawng. Minister chuan, January 15, 2021-ah sikul kal ṭan theih beisei a nih thu a sawi.

School Education Minister chuan, hripui léng avangin sikul kal theih a ni lo tih sawiin, "Kum thar January 15-ah chuan sikul kal theih beisei a ni. Naupangte hi kum hloh loa páwl sawntir tum a nih avangin loh theih lohin March chawhnu lamah exam tir tum a ni," a ti a; zirlaite chu TV leh online hmanga zirtirna pekte hmang ṭangkai turin a chah.

Lalchhandama Ralte chuan, Khawzawl district-a DEO leh DPO pisa hawn thar chuan kawng hrang hrangah awlsamna a siam dawn tih sawiin, "Kum a laklawh avangin tun kum kal laiah hi chuan Champhai district-ah thil ṭhenkhat tih a la ngai dawn. Financial year tharah erawh chuan a hrangin a kal thei tawh dawn a ni," a ti.

Education Minister sawi danin, academic session 2020-21 chu April 2021 thleng kalpui tur a ni a, pawl 10 leh 12 zirlaite tan March thla chawhnu lam leh April thla chawhma lamah MBSE-in exam a buatsaih dawn a ni.

Pisa hawnna inkhawmah hian Human Resources Development vice chairman L Thangmawia, MLA leh Lalmuanpuia, MLA-te pawhin thu an sawi.