COVID-19: Mizoram dinhmun Vei hmuh thar 9, chhuahtir 24

December 14, Thawh­ṭanni khan Mizoramah Covid-19 vei mi pakua hmuh chhuah a ni a; nimin khan hripui laka fihlim tawh mi 24 chhuah­tir a ni thung.

Thawhṭannia Covid-19 positive hmuh chhuahte chu mipa paruk leh hmeichhia pathum an ni a; ZMC laboratory-a hmuh mi panga, TrueNAT-PCR hmanga hmuh pakhat leh Rapid Antigen Test (RAT) hmanga hmuh mi pathum an ni.

Covid-19 veite enkawl­na hmun aṭangin nimin khan hripui laka fihlîm tawh mi 24 chhuahtir an ni a; Aizawl district-ah mi 15, Lawngtlai district-ah mi pariat leh Serchhip district-ah mi pakhat an chhuak.

Mizoramah swab sample 1,65,763 endik tawh aṭangin Covid-19 positive mi 4,049 (2.44%) hmuh chhuah a ni tawh a, mipa 2,979 leh hmeichhia 1,070 an ni. Nimin tlai dar 5 thleng khan mi 3,893 (96.15%) chhuahtir an ni tawh a, mi pasarih (0.17%) thi tawhin, enkawl mek mi 149 (3.68%) an awm.

Mizorama Covid-19 positive hmuh chhuah tawh mi 4,049 zinga mi 1,918 chu Mizoram chhunga kái an ni a, mi 2,131 chu state páwn aṭanga rawn lût an ni.

December 14, Thawhṭanni khan Mizoramah swab sample 1,146 endik a ni a; ZMC laboratory-ah Aizawl district leh Serchhip district-a mi 583, TrueNAT-PCR hmangin district pakuaah mi 156 leh RAT hmangin district 11-ah mi 407 endik a ni. Hripui vei hmuh thar mi pakua chu sample endik zawng zawng 1,146 aṭangin 0.78% a ni.

Covid-19 positive hmuh thar mi pakua zinga paruk chu Mizoram chhunga hri kái niin, an zingah hri kai ṭanna hriat loh an awm lo a; natna (Covid-19 symptom) lang chhuak mi pakhat a awm.

Sorkar thuchhuah tarlan danin, ZMC laboratory-a RT-PCR hmanga mi 583-te swab sample endik zingah Covid-19 vei mi panga, Aizawl district-a mi vek hmuh chhuah an ni a, mipa pali leh hmeichhia pakhat niin, an zingah naupang kum 6 mi a tel.

ZMC-a hmuh chhuah zinga pathum chu Mizoram chhunga kái an ni a, mi dang pahnih chu state páwn aṭanga tun hnaia rawn lut an ni thung.

TrueNAT-PCR hmanga hripui vei hmuh chhuah chu BSF sipai, tun hnaia West Bengal aṭanga rawn lut a ni a; RAT hmanga hmuh chhuah mi pathumte chu Lawngtlai district-a Mámpui khaw mi, tualchhunga hri kái vek an ni.

ZMC-a hmuh chhuahte:

Sihphir Venghlun - 2: Mipa kum 6 & 36, pafa an ni. An chênpuite zinga mi +ve hmuh tawh, home quarantine lai, symptom nei lo ve ve.

Edenthar Veng - 1: Hmeichhia kum 58, a chenpuite zinga mi +ve hmuh tawh, home quarantine mek, symptom nei lo.

Chawnpui - 1: Mipa kum 32, tun hnaia Silchar aṭanga haw, home quarantine lai, symptom nei lo.

Zemabawk North - 1: Mipa kum 37, CRPF, tun hnaia Assam aṭanga haw, symptom nei lo.

TrueNAT-PCR-a hmuh:

BSF, Melte - 1: Mipa kum 31, 131 Bn BSF mi leh sa, West Bengal aṭanga rawn lut, an batallion camp, Meltea inkhung hrang lai, symptom nei lo.

RAT hmanga hmuh:

Mampui - 3: Mipa kum 10 leh hmeichhia kum 13 & 36, Lawngtlai district-a Mampui khua. Hri kai ṭanna hriat; symptom nei pakhat, nei lo pahnih.