Ruatkima'n Serchhip Press Club a hawng

Mizoram Journalist Association (MJA), Serchhip district-in Serchhip Press Club an sak thar chu nimin khan IPR minister Lalruatkima'n a hawng a; Rev. B Lalengzauva'n ṭawngṭaiin Pathian hnenah a hlân.

Hawnna inkhawm hi Serchhip Press Club-ah neih a ni a, Serchhip MJA Vice president C Ramengmawia'n a kaihruai. Minister Lalruatkima chuan, district hrang hranga press club-te tihchangtlunna tur ngaihtuahpui zel a ni tih sawiin, media tel lo chuan sorkar a kal theih loh thu leh media tihhmasawn kawngah theihtawp an chhuah a ngaih thu a sawi.

Lalruatkima chuan, chanchinbu chu sorkar hmalakna mipuite'n an hriatna leh thu dik an hriatna a ni tih sawiin, "Media rintlak ni tur chuan duhsak bik leh thleih bik neih a thiang lo a, khawtlang leh ram tana ṭha tur a nih chuan thu dik ziah mai tur a ni," a ti a; ram dang media-te el pha turin Mizoram journalist-te'n theihna an neih thu sawiin, ṭan la zel turin a chah.

IPR Minister chuan, social media hman danah inzirtir nasat a la ngaih thu sawiin, "Thu khal lutuk leh déngkháwng lutuka kan indéng fo mai hian kan ram a tichhe mai ang tih a hlauhawm ṭhin. Ṭhalaiten chanchinbu leh lehkha chhiar an thlahthlam lutuk hi a ṭha lo a, hemi kawngah hian inzirtir nasat a ngai," a ti.

MJA Gen.Hqrs president Zonunsanga Khiangte pawhin thu sawiin, Serchhipin Press Club an nei ta chu an lawmpui thu a sawi a; Serchhipa sorkar department leh MJA-te chu thawhhona ṭha tak nei zel turin a chah.

Serchhip district MJA president Kapliana Pachuau chuan, Serchhipah Press Club an nei ve ta chu an district tan hmasawnna thar a nih thu a sawi a; tun hmaa Press Club an lo neih tawh chu AYUSH OPD/Ward sakna atan an lo hlan tawh thu a sawi. Press Club chu pawl leh kohhran bil ta a ni lo a, mi zawng zawng ta, mi zawng zawng lenna a nih avangin ṭangkai taka hmang turin mipui a sáwm a ni.

MJA Serchhip district general secretary T Biakchamliana sawi danin, Serchhip Press Club hmun atan Health department ram hawh a ni a, May 30, 2018-ah khatih laia chief minister Lal Thanhawla'n a sakna tur lungphùm a phùm bakah, bul ṭan nan Rs. 10,00,000 a pe. Cheng nuai 10 hmangin February 23, 2019-ah sak ṭan a ni a; sak mek laiin Rajya Sabha MP hlui Ronald Sapa Tlau-in MP fund aṭangin Rs. 2,00,000 a pe bawk.