ZPM-in an hmachhawp an puang; 'Danglamna kan siamho hun a ni' - ZPM

Aizawl huam chhunga ZPM party candidate ṭhenkhat - Dr Vanlalthlana, B Lalchhanzova, TBC Lalvenchhunga, Lalnghinglova Hmar leh Baryl Vanneihsangi Tlau te chuan nimin khan Aizawl Press Club-ah thuthar thehdarhtute an kâwm a; ZPM hmachhawpte sawiin, danglamna siampuiah mipui an sáwm.

Press statement chhiartu Baryl Vanneihsangi chuan, Mizoramah danglamna siam a hun tawh tih sawiin, "Danglamna siam tur chuan ZPM hi mipui rin ber leh mit fûkna ber a ni a, beiseina thar nena khawngaih taka in vote hlu tak min pe turin Mizoram mipui kan sáwm. Tun hi huaisen hun a ni a, danglamna kan siamho hun a ni," a ti.

Baryl Vanneihsangi chuan, ZPM a sorkar chuan awmze nei zawkin sorkar kalpui a nih dawn thu sawiin, "Mahni kea ding chhuak duhte dâwm kàn an nih dawn avangin mipuite'n nasa takin hma kan sawn dawn," a ti a; Sustainable Development and Reforms Policy hmangin state intodelh, eirûkna nêkchêpna leh mi taimate dinchhuahna ram siam theih a nih thu a sawi.

Mizoram state a nih hnuah MNF leh Congress party-te'n thuneihna an inchan chhâwk tih sawiin Baryl-i chuan, "An thiam leh theih tâwka hma lain, an hun leh thâ, sum leh paite pawh Mizoram hmasawnna atan an lo hmang tawh. Tuna kan thlen chin kan en erawh chuan nu leh pa leh ṭhalaite hmasawn belh theihna tam tak kan hmu a ni," a ti.

Aizawl South-III biala ZPM candidate Baryl-i chuan, website hrang hrang leh social media kaltlangin India ram puma state khaikhinnaah Mizoram a hniam tih hriat theih a ni tih sawiin, "Tuna kan dinhmun aia sanga min thlenpui thei tur kan zawnnaah ZPM-ah beiseina thar kan nei ta a ni," a ti a; ZPM-in hmachhawp a neihte chu mi tam takin ram siamṭhatna atana rintlakah ngaiin ZPM an zawm nasa niin a sawi.

Zawhna chhángin ZPM candidate-te chuan, BJP nen an thawkho dawn lo tih an hruaitute'n chiang taka an sawi tawh thu an sawi a, August 25, 2023-a ZPM Gen. Hqrs Executive Meeting-in, 'Kum 2023 Mizoram Legislative Assembly inthlan lo awm turah BJP kan thawhpui dawn lo tih kan puang e' tia resolution an siam tawh thu an sawi bawk.