Congress kaihthawhin a awm mek - Lal Thanhawla

Congress Working Committee member leh MPCC president hlui Lal Thanhawla chuan, Mizoramah sorkar ṭha siam a, sakhaw zalenna tung ding leh turin Congress party kaihthawhin a awm mek niin a sawi.

Nimina Serchhip bazara Serchhip District Congress Conference-ah thu sawiin Lal Thanhawla chuan, Mizoramah Congress party-in hruaitu a nei ṭha ber niin a sawi a, "Sorkar ṭha siam tura kan intihchak tawn avangin vawiinah pawh mi thar za télin Congress an zawm. Mizoramah sorkar ṭha siam a, sakhaw zalenna tung ding leh turin Mizoramah Congress party kaihthawhin a awm leh mek. Mizoram mipuite'n eng party nge hmanruaa hman tur leh chawi len tur hriat a ngai," a ti.

Lal Thanhawla chuan, India ramah sakhaw zalenna a awm chhan chu Congress party nia sawiin, "BJP sorkarna hnuaiah India ram hmun hrang hrangah Kristiante an chêp hle," a ti a; Manipur-ah pawh Kristiante chungah harsatna nasa tak a thleng chungin prime minister Narendra Modi a ngawih tlat thu a sawi.

BJP sorkar hnuaiah Kristiante leh sakhaw dang an him lo nia sawiin Hawla chuan, "Hnam tênau zawk chîm ral tumna a lian hle. Congress chuan sakhaw tih bik neih a dodal a, Mizoram mipui pawhin kan sakhua leh kan hnam a him theihna turin eng party nge chawi len ngai tih ngaihtuah a hun. Vote thlakna tur uluk loh nasa taka tuartu chu Manipur aṭang pawhin a chiang a ni," a ti.

CWC member chuan, Congress party chu Pathianin a chawlh hahdamtir nia sawiin, "MNF unaute an sorkar a, an hnathawh hmasak ber chu hming thlak a ni. MNF-in ar vulhna atana an chhuah, Congress-in sorkarna a chan hnuah Mizoram Institute of Medical Education & Research ṭha tak a din chu hnathawh awm si loin Zoram Medical College tiin an thlak a ni," a ti a; SEDP pawh MNF sorkarin an sem mai thei lo a, inthlan dawn kumah campaign nan an sem chauh niin a sawi.

Lal Thanhawla chuan, ZPM chungchang sawiin, "ZPM-in kalphung thar an sawi a, an kalphung hlui hi eng nge ni ang? Val Upa Council leh tih loh atana an sawi ang apiang an ti leh vek bawk si. Kalphung thar hi ka la hmu lo. Kalphung tharah chuan hamṭhatna dawn theih zawng zawng hmanhmawh taka dawn zung zung hi a ni ber," a ti.