Hnam dang pasal nei candidate duh loin MZP-in kawngzawh an tum

MLA candidate atana hnam dang pasal nei Mizo hmeichhia dah duh loh lantir nan MZP chuan vawiin hian kawngzawh huaihawt an tum a, 'Hnam humhimna kawngzawh' tiin an vuah.

MZP chuan thuchhuah siamin, MZP ngenna zah loin Indian National Congress (INC) chuan Lunglei South biala an candidate atan hnam dang pasal nei Meriam L Hrangchal an dah tih an tarlang a, "Ani hi Dipen Zoliana nupui a ni a, Dipen Zoliana pa chu Niraj Singh niin, a nu chu Kawlhmingliani, Gorkhali dik tak a ni," an ti.

Mizo Hnam Dan (Mizo Customary Law) bung 3:74-ah, 'Mizo hmeichhiain hnam dang pasal a neih chuan hnam dang chhungkuaah a luta ngaih a ni' tih a nih thu sawiin MZP chuan, "Mizo hmeichhia, hnam dang neite chu hnam dang chhungkuaah kan ngai nghet tlat a, Mizo mipui aiawha ram rorelna sang bera ṭhu turin kan pawm thei lo," an ti a; Mizo nihna hi Mizorama awm rei tawh avanga inpek chi-ah an ngai lo a, thisenah a awm zawk niin an sawi.

MZP chuan, "Mizo hnam damna turin hnam dang pasal nei candidate hnâwla vote lo turin mipui kan ngen a, hetiang mi candidate-a dahtu Congress party pawh kan dem tak zet bawk," an ti.

MZP hian December 19, 2022 khan hnam dang pasal nei candidate-a dah lo turin ngenna an siam a, August 21, 2023 khan political party tin hnenah ngenna an thawn bak­ah, party hotute an hmu a ni.