RIPANS zirlai thlahna leh lawmna Mizoram Governor-in a hmanpui

College of Nursing, RIPANS chuan nimin khan Woodland Hills-ah Graduation and Lamp Lighting Ceremony vawi 23-na an hmang a, Governor Dr Hari Babu Kambhampati-a'n hmanpuiin, zirlai ti ṭha zualte hnenah lawmman a hlan.

Lamp Lighting Ceremony-ah Synod Hospital nursing superintendent C Thankhumi kaihhruaiin B.Sc. (Nursing) zirlai thar 48-te'n nurse thutiam 'Florence Nightingale’s Pledge' an chham a, bati an chhí. RIPANS director Prof. Sanjay D Sawant-a'n zirlai chhuak tur mi 36 hnenah lawmpuina thuziak a hlan bawk.

Dr Hari Babu Kambhampati chuan, B.Sc. zir zo tharte chu a lawmpui thu sawiin, an hma lam hunah hlawhtlinna nei chhunzawm zel turin duhsakna a hlan a; zirlai lut tharte chu ṭhahnemngai taka zir turin a fuih.

Governor chuan, nursing chu Mizote leh hmarchhak mite ṭhatna a nih thu sawiin, "Nurse-te tan India leh leh ram dangah hna thawh tur a tam hle a, Mizo nurse-te hi state pawna an thawhnaah an chhuanawm hle a ni," a ti a; nurse leh hriselna lama thawktu ṭha tak tak chher chhuaktu RIPANS hnathawh chu ropui a tih thu a sawi.

RIPANS College of Nursing hian kum dang zawng aiin kuminah result an nei ṭha a, Mizoram University-in exam a buatsaihah final year-a top 10-a lang mi 12 zinga 10 chu RIPANS zirlai an ni a, a din tirh aṭanga result an neih ṭhat ber ṭum a ni. RIPANS-ah hian batch 24-in B.Sc. Nursing an zir chhuak tawh a, chungte chu mi 750 an ni.

Kum 1996 khan RIPANS-ah B.Sc. Nursing zirna hawn niin, Mizorama B.Sc. Nursing zirna hmasa ber a ni a; MZU, Mizoram Nursing Council leh Indian Nursing Council pawmpui a ni. Tun dinhmunah B.Sc. Nursing, B.Pharm, B.Optom, BMLS, Bachelor in Radio Imaging Technology, M.Sc. Nursing, M.Pharm leh M.MLS te zir theih a ni bakah, Pharmacology-ah Ph.D tih heih a ni.