Inthlan inbuatsaihna a kal mek

Serchhip district election officer David Lalthantluanga, bawrhsap chuan nimin khan a pisaah thuthar thehdarhtute a kâwm a, MLA inthlanpui awm tura an inbuatsaih dan a hrilhfiah.

David Lalthantluanga chuan, nimin tlai dar 3 thleng khan Serchhip district-a assembly constituency pathuma candidate ni turin mi 13-in nomination an thehluh tawh thu a sawi. October 18, Nilaini khan mi pahnih leh nimin khan mi 11-in nomination an thehlut a ni.

Serchhip district-a Assembly constituency pathuma returning officer leh assistant returning officer te, thuthar thehdarhtute leh political party aiawhte hriatpuiin nimin khan electronic voting machine (EVM) hman tur chinfelna (randomisation of ECVM) buatsaih a ni a, EVM leh voter verifiable paper audit trail (VVPAT) ṭhen hran a ni.

Nimin vek khan Kolasib district-a MLA bial pathuma second polling officer leh third polling officer-te pualin St. John's Higher Secondary School-ah training thawh khatna buatsaih a ni a, chawhnu lamah EVM hman dan a taka zirho a ni. Ruahman lâwk dan chuan, polling official (PRO leh PO)-te pualin training thawh thumna thleng buatsaih tum a ni.