Sorkar ṭha siam ngei kan tum - Lalsawta

Mizoram Pradesh Congress Committee (MPCC) president Lalsawta chuan, sorkar ṭha siam ngei an tum thu a sawi a; Lunglei South biala an candidate tur Meriam L Hrangchal chu mi ṭangkai tak tur a nih thu a sawi bawk.

Lalsawta hian nimin khan Aizawl West-III biala ding turin Assistant Returning Officer hnenah nomination paper a thehlut a; chanchinbumite zawhna chhángin, "MLA General Election 2023-ah hian Congress party chuan hnehna chana sorkar ṭha siam ngei kan tum. Aizawl West-III bialah pawh hian mipui ṭha tak tak zarah ka chak ngei ang," a ti.

Tun hnaia Rahul Gandhi rawn zin chuan Congress party boruak a siam hle nia sawiin Lalsawta chuan, "An chhungkaw ngilneihzia leh Mizo min hmangaihzia a lang chiang hlein ka hria. Nasa takin Congress party min tichak a, hma min sawntir a ni," a ti a; mipui tam takin an ngaisang chu an lawm thu a sawi.

Meriam L Hrangchal chungchanga zawhna chhángin Lalsawta chuan, "Pi Meriam-i hi Congress hian candidate atan kan duh em em, mi ṭangkai tur a ni tih kan hria a, chuvangin, candidate-ah kan dah a ni. Lo engtotu an awm ngei ang tih kan ring a, bial tinah hian Congress hi ding lo vek phei ila chuan tam tak hi an lawmin ka ring. Pi Meriam-i chungchang hi kan ngaihtuah ngun a, kan party tan chauh ni loin, Mizoram tana ro hlu (asset) nia kan hriat avangin kan dintir a ni," a ti.

MPCC President chuan, Congress party chu sakhaw zalenna duhtu an nih thu sawiin, bial hrang hranga an party candidate-te vote turin mipui a sáwm a ni.