KHAWTHLIR
Mizo tawng zirho
Pachhunga University College-a Mizo department leh Mizo Grammar Society chuan nimin khan PUC Seminar Hall-ah Mizo ṭawng hmakhua zirhona an buatsaih a, Mizo Language Development Board chairman R Lallianzuala leh PUC principal Prof. H Lalthanzara ten an hmanpui. Mi pasarih thuziak zirho a ni.
Mamit Jail enfiah
Mamit district-a Integrated Child Protection Scheme hnuaia din Jail Inspection Team chuan nimin khan Mamit District Jail an tlawh a, jail dinhmun bakah, táng zingah naupang an awm leh awm loh an enfiah.
Pastor nupuite Intawhkhawm
Mizoram Presbyterian Kohhrana pastor nupuite chuan nimin khan Synod Conference Centre-ah intawhkhawm vawi 43-na an hmang a, pastor nupui mi 207 an tel. Chawhmaah Upa C Ngurthantluanga'n 'Pastor nupuite leh tunlai khawvel' tih thupui a sawi a, chawhnuah Lalrinngheti Ralte-in 'Hriselna atana ei leh in lam' tih thupui a sawi bakah, intihhlimna hun hman a ni.
Mibo thiin hmu
Lalrintluanga s/o Vanlaltluanga, Zawlpui chu nimin chawhma dar 10 pelh khan Lunglei Bazar Venga mi in hnuaiah thia hmuh a ni. Thu dawn danin, Lalrintluanga hi October 14, 2023 aṭang khan a awmna chin hriat a ni lo a, YMA Sub-Headquarters, Lunglei kaihhruaina hnuaia Lungleia YMA branch hrang hrang member-te'n an zawng a, nimin khan Bazar Venga B Zaawia te huan sâmtu chuan B Zaawia te in hnuaiah thiin a hmu a ni.
Silai tung turin ti
Champhai district magistrate James Lalrinchhana chuan, Champhai district-a silai license neite zinga silai tung tura tih leh hriattirna dawngte chu an awmna khua/veng aṭanga police station/outpost hnai berah October 18, 2023 aṭanga ni sarih chhungin an silai tung vek turin a hriattir.
KCC campaign
Mizoram Rural Bank, Mamit Branch chuan nimin khan Mamit Hmarveng community hall-ah Ghar Ghar KCC Campaign an buatsaih a; NABARD hotu JD Traite leh Lalengmawii bakah, Agriculture, AH & Vety leh Fisheries department hotute'n Kisan Credit Card loan hmanga hamṭhatna awm theite an sawifiah.